鄧小巧接受訪問，她自爆曾經歷長時間零收入，她感謝細家姐身兼兩職，可以讓她「任性」地去追夢。
鄧小巧感謝細家姐讓她「任性」地去追夢。
鄧小巧入行七年，早前於《叱咤樂壇頒獎典禮》上奪得「生力軍金獎」，他接受商台《1圈圈 星光背後》訪問時透露曾經歷長時間零收入，細家姐指她是公眾人物，寧願身兼兩職賺錢養家。談到與細家姐的感情時，她熱淚盈眶說：「細家姐覺得欠了我，因為兒時她曾經差點把我浸親！當年，她用僅餘的利是錢買了個結他送給我！」她稱收入不足時曾要求分擔家庭負擔，但家姐認為她都算是個公眾人物，不應拋頭露面：「她做廚師，下午做一家餐廳，晚上做摩洛哥餐廳，變了完全沒私人及休息時間，每天都很疲累！」她很感激對方體恤自己的任性，希望日後賺錢請家姐去旅行。
鄧小巧接受商台節目訪問。
2009年參加《超級巨聲》後，獲安排唱劇集《天天天晴》主題曲的《半杯水》，但卻令她更感到前路迷惘：「當時許廷鏗還未有機會唱《我的離開也是愛》，他曾跟我說：『你就好啦，有歌！』但對於我：『真的好嗎？這機會代表什麼呢？』得到一個其他人很想得到的機會，但為什麼自己不開心呢？因為我本身對音樂製作的畫面並不是這樣，『不喜歡公司挑選了，幫你安排好？』，我好像只貢獻了聲帶演繹，沒有靈魂的，沒有參與！更促使我要等約滿離開。」她指唱完這首主題曲更迷失，更不知自己做什麼，但同時感謝這首歌的出現令她自己知道想要什麼。
連詩雅：「我過咗嗰個『嫩』啦！」
由鄧小巧主理的網上歌唱節目《Singaholic》來到第五集，今集請來剛宣佈造人成功的連詩雅（Shiga）任嘉賓，由於是宣佈有喜後首個歌唱及訪談節目，期間二人大談生仔經及新婚話題。小巧更謂Shiga是首位現身節目的人妻嘉賓，「可以陪我一齊傾人妻話題。」
連詩雅（Shiga）為鄧小巧主理的網上歌唱節目擔任嘉賓。
由於二人均是新婚，所以話題總離不開婚姻生活、跟另一半的相處。小巧問Shiga最「唔掂」老公陳家樂甚麼事，Shiga第一樣便是投訴他不洗碗，「係唯一一樣要投訴。但我要澄清雖然佢唔洗碗，但因為我都唔洗衫，哈哈，所以佢負責洗廁所、洗衫呢啲清潔部門，但廚房入面所有嘢就係我負責。」而小巧則最頂唔順老公狂食西餐，Shiga憶述有次在家中問小巧想吃甚麼，她第一句便是「總之唔好西餐就得」，小巧隨即向Shiga大呻苦況，「以前冬天好鍾意招呼啲朋友嚟我屋企打邊爐，我今年係一次喺屋企打邊爐嘅經驗都冇！因為佢憎打邊爐，佢問why？『點解你哋可以煎、炒或者燒啲嘢，點解你哋要烚熟佢呢？』我哋打邊爐成日都會有啲骨、海鮮等各樣，雞腳嗰啲佢話：『點解一塊牛扒同雞腳面前你會揀雞腳？』我真係解釋唔到，因為我真係會揀雞腳！我話啲皮索晒啲汁又炆到好腍，食完個嘴又張住有膠質，我覺得好正！」
Shiga宣佈有喜後首次上節目。
Shiga笑言婚後每次見到親朋戚友時，第一句說話就是「幾時生仔？」
至於生仔，即將成為母親的Shiga表示婚後每次見到親朋戚友時的第一句說話就是「幾時生仔？」小巧即謂：「個個都話有仔趁嫩生。」Shiga即笑謂：「我過咗嗰個『嫩』啦，哈哈。其實我係一個幾大唔透嘅細路嚟嘅，不過有啲人生咗反而打理得頭家好好，有啲好成熟嘅反而搞唔掂，所以我就話when it comes you”ll be ready. 我嘅心態係隨緣多啲，go with the flow. 」可能因為身份的轉變，當Shiga唱完講述母親的《雲吞》後特別感觸，問到母親做過一件最令她感動的事時，Shiga表示很多，「我係媽咪湊大，佢係經濟支柱，我哋係相依為命，所以……（抹眼淚）以前唱情歌係好觸動到，但原來人去到另一個階段，經歷多咗、人越大、屋企人越嚟越老，要經歷生離死別。我好慶幸我媽媽仲喺我身邊，但因為佢年紀真係比較大，佢四十歲先生我，所以我一路唱呢首歌同埋睇MV嘅時候，我最初好激動唱唔到，歌詞令我覺得好有共鳴。」小巧謂對Shiga一番話特別深刻，「佢話：『我自己窮有乜所謂啫，我要養我阿媽，我自己瞓天橋底都得，但我唔可以俾我阿媽瞓天橋底！』」
小巧提起母親感動事，一開口便已哽咽。
提起母親感動事，小巧一開口便已哽咽，「我阿媽最令我感動嘅係一句說話⋯⋯」她表示步入青春期時，大約是中三，她開始有自己買衫的想法，但被媽媽迫去街市買衫，「我梗係唔高興啦，點揀啫！揀唔到啊！我阿媽嗰次發咗個好大嘅脾氣，覺得點解俾錢我買衫、陪我去買衫，我仲嫌棄啲衫。直至七、八年前，我阿媽突然之間有一日：『女女啊……』佢話：『女女啊，媽咪對唔住你呀……』我阿媽應該係第一次同我講對唔住，佢話：『我都唔明白點解嗰陣會逼你去啲師奶嘅街市買衫呀，真係對你唔住啊。』我係…… 我哋有四兄弟姊妹，佢真係要去做嘢，所以佢不能每一日都見住我哋長大，我覺得佢到一個年紀，佢開始明白我嘅諗法，然後我亦都大個咗，我不斷去同佢講好多我嘅諗法之後，我覺得互相明白咗。其實嗰件事去到咁大個，我一啲都冇嬲啦其實講真句，只不過係阿媽會去邊度買衫佢咪帶我去邊度買衫囉，係咁樣嘅一件事。但係佢嗰句對唔住，我覺得好Powerful。」
Shiga邊聽邊喊埋一份！
邊講邊喊的小巧笑說本想搞喊Shiga，最後卻搞喊自己，坐在旁邊聽的Shiga其實都邊聽邊喊埋一份，「我已經喺屋企喊咗好多次先出嚟，好多謝你有呢首歌。」節目在充滿笑與淚的聲音中結束。
