何佩瑜(Jeana)近期在台灣墾丁拍攝電影《天使曾經來過》日前煞科,昨晨她卻不幸遇上交通意外,其所乘坐的七人車車頭及車側炒至凹陷變形,當時坐於司機位旁的Jeana撞及頭、眼、鼻,同車10歲大馬小演員盧宣彤 (Debbie) 亦受輕傷,兩人立即被送院,幸經檢查及照X光後傷勢無大礙,均已出院休息。

何佩瑜拍攝電影《天使曾經來過》。

何佩瑜拍攝電影《天使曾經來過》。

Jeana昨早乘坐劇組安排的七人車,從墾丁前往高雄,車程約兩個小時,原定抵高雄逗留一晚後,於今日返港。據知劇組安排了一位年輕女司機接載Jeana和小Debbie,但當車輛由墾丁駛去高雄的路段時突然失控,猛力撼向石壆,在車上瞓覺的Jeana嚇到花容失色,事後她和小Debbie感不適,齊被送院檢查。

何佩瑜於車禍受傷送院。

何佩瑜於車禍受傷送院。

回想車禍一刻,Jeana仍心驚膽戰:「發生嘅時候,唔係好知發生乜事,因為嚟得太突然,我都係第一次遇上交通意外。我喺醫院諗番轉頭,如果我哋架車當時係撞向另一邊,係會碌落山,可能上得香畀我,諗番好心寒,所以不幸之中大幸,真係好好彩!以前聽就就聽得多,呢次我感受到車禍嘅震撼力,仲要撞到咁大力,不能想像架車反轉嘅話會係點,真係好危險!」

何佩瑜受傷同時也心痛大馬童星傷勢。

何佩瑜受傷同時也心痛大馬童星傷勢。

現時Jeana的頭、鼻、眼依然好痛,有輕微紅腫,她苦笑前日拍潛水煞科戲時,已多次徘徊鬼門關。她說:「嗰日我要全程hold住呼吸,閉氣落到水底仲要做戲,每次都想用盡啲秒數做戲,所以好『忟』先上水,試過控制時間錯咗差啲窒息,所以每一次上水,望到海面一唞氣就好感動,好似來來回回鬼門關咁,估唔到煞科再有車禍;以前冇諗過生命可以咁脆弱,今次意外反而令我諗到,真係在乎一秒鐘之間嘅事,依家會更加珍惜身邊人。」

留台兩個月,之前Jeana因為在墾丁學潛水傷及耳膜,於當地睇醫生;豈料到留台最後一夜,又要入院,不過Jeana就為飾演她女兒的小Debbie心痛,「因為我同佢都受咗傷,佢撞親下巴,我撞親個頭,眼同鼻都腫咗;但最慘係小妹妹,佢同我一樣拍呢套戲時,喺台灣睇過兩次醫生,希望佢都快啲好番。」雖然小Debbie昨午已在facebook報平安,留言「逃過一劫」。