認真去玩，原來都有出路，看鼓佬李健宏（Kevin仔）就知，繼網上整蠱節目《玩爆你個腎》成功出位後，在ViuTV節目《晚吹─真PK》玩得仲癲，自虐式含臭襪、舔大隻佬胳肋底，如今全港人都知PK主持好玩得。
日前Kevin仔拖女友睇婚戒，兩人在店內巡視一圈後，揀定款式就坐低慢慢試，事後Kevin仔直認好事近，他說：「其實去年初已求婚成功，計劃今年做老襯，我份人鍾意簡單，結婚唔會大搞。」
Kevin仔拖實女友去開飯。
當日所見，Kevin仔拖着女友小白現身銅鑼灣利園Van Cleef & Arpels珠寶店，兩人入店巡了一圈便選定兩款情侶戒指試戴，店員曾拿出多款鑽戒、耳環、頸鏈供他們挑選，但Kevin仔沒多意見，婚戒款式全由女友發板，試足大半粒鐘才笑意盈盈地離開。
結婚戒指全由女友小白話事，Kevin仔在旁乖乖靜候。
事後Kevin仔對揀婚戒一事直認不諱，他說：「拍拖七年都係時候，女友同我一樣鍾意簡簡單單，結婚唔會大搞，唔想好似做騷咁又喊又笑，亦唔打算搞party，費事煩到啲朋友，只會飛去澳洲跟我家人食飯同簽紙。」說到求婚過程，Kevin仔說：「去年初去二世古滑雪，一出酒店門口就拉住女友selfie，左手揸機右手攞戒指，佢見到驚訝，係咁叫我返入酒店先講。」
一向喜歡小朋友的Kevin仔表示婚後唔會生，「鍾意玩人哋嗰個咪得囉，我有個契女好得意。」
說到《真PK》節目大受歡迎，ViuTV有意添食，Kevin仔說：「係有這打算，但會轉形式玩，Round 2又玩呢啲就唔好笑。
跟火火合作學到好多，唔止做主持，連做戲都有得着，火火搵我拍《女士復仇》演變態佬，過去客串不少電影，但第一次有導演走來教我演戲，Stephy亦會提我做戲時條眉唔好郁得太勁，因咁會好KB，真心講，我好感動，亦因為這部戲愛上電影。」
Kevin仔笑言在《真PK》的懲罰，平時有玩，自覺得問題不大。
