Skip to Content Facebook Feature Image

焚焚~ 今時唔同往日的珠寶業(上)

絲打

焚焚~ 今時唔同往日的珠寶業(上)
絲打

絲打

焚焚~ 今時唔同往日的珠寶業(上)

2016年08月22日 03:47 最後更新:18:17

珠寶展過後,老細總會有呢一句:「唉!一年靜過一年!」呢一句係年年都會講嘅金句,係焚焚入行咁耐就聽足咁耐,完全冇聽過有年會講:今年終於好番少少⋯⋯Sorry,係冇呀!不過擺過show嘅行家都會明白,亦都親眼睇住個市道愈尼愈靜。甚至聽番有啲行家話下次唔再擺會展嘅珠寶show,我問佢點解,佢話基本上尼尼去去都係嗰幾位老熟客,與其係咁,索性帶啲客上公司睇貨,乾脆唔擺show慳番一筆。

 
唔擺show的好處?
  
唔擺show又確實慳番不少嘅,每次擺show開支起碼十萬,以我公司為例,每次都擺兩個booth,正常位已經要超過十萬(利申:價錢都係聽老細講,實際價錢唔清楚),仲有其他開支,例如保險,運輸,伙食,茶水(有啲公司會買咖啡機,喺booth內放迷你雪櫃,但我公司怕麻煩,因為喺booth內揾水源去沖嘢飲,係一件好麻煩嘅事。所以客人嘅茶水,通通都喺展場內個小賣部買),仲有應酬等等!珠寶展每年嘅三六九月都有,如果唔擺的話慳番幾十萬開支,對於小公司來計這個數目都不少架!
   

  
土豪客不再土豪?
    
不但只係零售業,出口業都步入寒冬。由過往每次珠寶展都見熟客尼香港睇新貨,到每年兩次,到而家有啲客淨係尼九月show(九月是一年最大的珠寶展)因為我地會去杜拜show丫嘛。以前啲中東土豪客睇貨,數以百計,再每個款式幾隻,只要係大路款,只要是新貨,都照揀可也。而家淨係揀暢銷貨,新貨嘅話都要睇成本,計數機左計又計,篤到就尼爛咁滯。太貴嘅話淨係揀一兩款,造貨只做一兩隻。講價都比以前狠好多,以前講價,齋講齊頭(例如五十萬一千一百,會講到五十萬)而家係講到盡!仲要收唔足,狡滑中東佬,最鍾意扮傻,扮窮,面皮呎幾厚,唔尊重(女)人…最討厭嘅係搽啲比花露水仲要攻鼻嘅香水,睇完貨走嗰陣成個booth都彌漫著啲中東味,仲要久而不散,嗰下黑人憎丫嘛!
   

大公司收緊水喉?
 
到大行尼睇貨,都冇以前咁易話為。以前係,大行採購尼揀一批貨,當100件咁啦,即刻送去佢公司做QC,q完可能裡面有幾件有問題嘅,咁嗰幾件退番尼,冇問題嗰啲就可以開單!再揀某啲睇落幾賣得嘅造貨,每個款每間分鋪一隻,十幾個款十幾間鋪,一張單就百幾隻,你都咪話唔爽皮!而家聽番嗰度啲細講,100件貨照揀,但開會過後可能揀淨一半,之後再去QC,再冇十幾件,最後嗰三十幾件再講價,先開單。不過唯一好處啲大行採購冇啲中東佬講得多,話晒唔係用自己錢丫嘛!
 

服務好了的行家?
   
市道差了,供應商都勤力咗好多,好似某間K金供應商咁,我地只係訂咗十多條現成肅邦鏈配吊咀,今日訂,聽日有貨到!仲要老板親自送上尼,受寵若驚,慨嘆而家為咗生意迫到自己咁有效率!
 
 

 
其實主要係想嚇你,經濟真係開始衰退,如果你真係為賺錢嘅,真係唔好入呢行,其他行業仲好。今次講住咁多先,下一篇繼續嚇,會講下大行。如果喜歡焚焚寫啲嘅嘢,就唔好吝嗇你地嘅like,你地嘅支持就係我嘅動力。想知多啲有關珠寶嘅嘢,可以去《焚焚的珠寶鏈尾生涯》度睇下!如有咩想問或想我寫的話,留言比我!盡量滿足大家。

PS. 文章最底有個評分架!拍爛檔幫我like 一like丫~~!!

帶定頭盔先:本文章內容純屬虛構,如有雷同,實屬巧合,及本人意見並不代表所有業內人士意見,如有得罪,敬請原諒!




焚焚

** 博客文章文責自負,不代表本公司立場 **

往下看更多文章

行內常識:又關我事?

2016年12月12日 00:13 最後更新:11:08

電視劇套《幕後玩家》就做完喇!個結局好出人意表,翠如BB嘅演技又進步咗!而嗰套《致命復活》又好似好幻海奇情咁,究竟終極大佬又係邊個呢?唔好以為焚焚係電視汁撈飯嗰啲人尼,實情係屋企部電視幾個月冇開過咁滯,因為呢排真係忙忙忙,忙到連睇電視嘅心情都冇。事關要趕聖誕節又要準備定新年大陸廠收爐前嘅貨,真係忙到踢晒腳,所以請原諒焚焚失蹤咁耐家吓先出現。入番正題先,今次我想講下珠寶行業內嘅少少知識尼嚇下大家,等大家唔好入珠寶行業,想入行嘅你又可以尼呢度爬啦文。

旺淡季
大公司的話最主要都係忙節日,有三個大節日係最忙嘅,母親節,聖誕節,同情人節。仲有五一黃金週同十一黃金週,而peak season 同酒店一樣都係年中到年尾呢啲嘅結婚季節,所以如果做大公司寫字樓嘅通常都係呢啲日子要OT。而做出口的話有珠寶show就忙,好似三,六,九,十一月嘅香港珠寶展,呢啲日子你通常七點叫準時走,八點走叫正常。海外珠寶show的話你都唔使計O唔OT,因為通常就算準時走你都唔會比你單獨周圍走,更何況係多數都要遲收工。所以如果揾會計尼比的話珠寶業算準時,之但係以政府尼比的話呢行係辛苦到死呀!

大陸海關
大陸工場通常只係包工唔包料,所以我地會提供埋原材料。上金,石料上廠係非常普遍,而呢啲材料係需要報關,要記錄原料嘅類別,重量,甚至係原產地。有次負責報關嘅同事打尼問條金條嘅原產地,我地都R晒頭,因為我地都係同人買嘅啫,鬼知咁多咩!之但係大陸海關就係咁,如果資料一有咩唔啱,唔理你特登又好,唔小心寫錯又好,都會以資料不實為理由而扣你關,輕則罰錢了事,重則扣起你啲貨一年半載你都咪話唔大獲,所以有時星期五拎料上廠的話成個假期都好驚自己有冇寫錯嘢打錯資料攪到扣關!心理壓力都幾大㗎!

安全問題
藝人詩雅曾經做過珠寶業,由分行做到上寫字樓。睇過佢其中一篇嘅報導話做呢一行最緊要小心,曾經聽過有個行家比人扑頭,入埋廠添。咁珠寶業係咪真係咁危險呢?以焚焚尼講都唔算係好危險,因為呢啲事只係好似鬼故咁發生喺朋友個朋友身上,touch wood焚焚入行咁耐到而家都未比人扑頭打劫,或者同行朋友仔比人扑頭打劫。但自己都要提高警覺,保持意識,財不可以露眼,行事又要低調。相比起打劫,自己內部唔見貨則較常發生,so far已經有幾個行家同焚焚講試過唔見貨而賠錢,跌咗喺垃圾筒跟住掉咗又有呀!自已袋唔穩跌咗又有呀。有時又唔可以怪晒人嘅,真係唔好彩囉!但唯有係經驗同小心啲。

千其唔好比多姿多采嘅珠寶業呃倒,真真正正嘅珠寶業其實係人工又低,又辛苦,又唔安全㗎!聽完大家有冇對珠寶對卻步呢!希望可以阻止倒想盲目入行嘅你地啦!就算阻止倒一個都好!焚焚覺得好有使命感㗎!好啦!其實珠寶業仲有好多嘢講!焚焚今次嘅分享就去到呢度,下一篇再見!如果喜歡焚焚寫啲嘅嘢,就唔好吝嗇你地嘅like,你地嘅支持就係我嘅動力。想知多啲有關珠寶嘅嘢,可以去《焚焚的珠寶鏈尾生涯》度睇下!如有咩想問或想我寫的話,留言比我!盡量滿足大家。好吧!我地下星期一見!
 

PS. 文章最底有個評分架!拍爛檔比個讚同講得好我丫~

你 或 有 興 趣 的 文 章