焚焚不嬲都係有禮貌之人，縱使雙親好早唔喺度，可以大條道理冇家教，冇禮貌咁對人，但焚焚絕對唔會咁做，一個基本嘅禮貌絕對係影響倒個人修養，同埋我覺得禮多人不怪囉。點解忽然間焚焚談起禮貌來？因為焚焚覺得冇禮貌o既人真係好黑人憎。我知焚焚並冇資格去教人，只不過想同其他絲打呻下工作上嘅事啫⋯⋯
話說某家供應商借咗批寄售貨比我地，咁供應商講好咗九月初收番尼做show，但因為之前跟開嗰位同事冇做，所以大家都冇咗件事，直至一個禮拜前佢打比個經理話要收返先醒起佢話要九月初要收番，儘管我地點盡收，都有大約十件貨仲喺澳門，而因為報關問題而唔可以喺如期收番o的貨比供應商，所以作為鏈尾嘅我要通知呢位供應商要遲一兩日。
誰知呢位呀A（此供應商負責人）以土豪大媽高八度潑婦罵街式大鬧：「唔得呀!!!!!我借比你之前已經講明要九月初前還架啦!!!!我而家做show唔夠貨而家點先!!!!我唔理呀點點點點」（下刪一千字）⋯⋯係～！或者我地係有錯，或者你喺呢件事情係受害者，之不過點解呢啲怨氣要發洩喺我呢位鏈尾身上呢？雖然我份人工係包埋受氣，但係咪應該冤有頭債有主咁鬧問你借貨嘅嗰位經理呢？勁憎呢啲欺善怕惡冇吉屎嘅人囉！仲有貴公司啲貨咁少需要呢十件貨充撐場場面架？
係～呢個已經涉及家教問題，係有少少off topic。相比起其他vendor，佢真係極冇禮貌！其他vendor唔係架！咁送貨姐姐同Sales不嬲都好有禮貌，但有啲係老細親自交貨，真係勁好禮貌，唔該前唔該後，又麻煩晒呀咁，喂！我只係一個小小鏈尾，而你係貴為老細。基本上係唔需要對我咁有禮貌！但係就係因為你嘅禮貌，我會為你做一啲額外嘅嘢。
例如QC彈你啲貨，如果唔係涉及到件貨本身，例如石鬆，金花的話，可能只係字印上要打三個位但你打咗兩個呢啲小問題的話，基於你平時對我咁禮貌，我會幫你同QC揮下睇下可唔可以唔使退咁。可能我只係一個鏈尾，冇能力做啲咩，但我會盡我能力幫你等啲貨快啲落鋪，等你張單快啲過會計，等你快啲有票收咁。又或者經理買現貨的話會送尼過QC，如果本身有啲貨唔過的話就算數唔要，但如果你平時對焚焚有禮貌的話我會幫你問經理睇下可唔可以修理完再開單，等你可以多啲生意。BTW如果係A的話我唔會咁做囉。
大家都係打工，大家都冇必要奉旨睇你面色受你氣，好多時一個唔該，一句麻煩晒，已經係一個尊重，只要大家有禮貌少少，態度客氣少少，喺工作上應該會順利好多！起碼你唔會黑人憎，而我亦都會幫你多啲。講真供應商你地好生意我呢個鏈尾冇佣收架，好多時焚焚需要嘅，只係一個尊重，而一個基本o既禮貌絕對係保持良好合作關係o既重要因素囉～好吧，今次呻到呢度，我地下星期一見～～
如果喜歡焚焚寫啲嘅嘢，就唔好吝嗇你地嘅like，你地嘅支持就係我嘅動力。想知多啲有關珠寶嘅嘢，可以去《焚焚的珠寶鏈尾生涯》度睇下！如有咩想問或想我寫的話，留言比我！盡量滿足大家。
*帶定頭盔：本人意見並非所有業內人士之意見，如有得罪，敬請原諒。
PS． 文章最底有個評分架！拍爛檔幫我like 一like丫～～！！
焚焚
** 博客文章文責自負,不代表本公司立場 **
