呢排比四大瘟神攪到我呢個鏈尾冇好日子過，負能量實在太勁喇！不過唔可以再咁落去，所以決定唔理佢地住，講番啲珠寶嘢先！9月嘅香港珠寶show話咁快就完結，成績就不過不失！接住落尼就係杜拜嘅沙迦show。做開細公司嘅鏈尾都知除咗要擺香港show之外，間唔使都會擺下海外show，而去邊個國家就睇各鏈尾嘅公司做咩水嘅！焚焚做就主要做中東水，所以有時都會去下中東幫手擺show！焚焚今次會講下海外show嘅辛酸！
唔好以為有得出trip就好開心！話你聽如果擺香港show有8個辛苦，杜拜show就有13個辛苦！！成個trip最攞命之處就係冇得你Hea，由你喺公司出發去機場嗰一刻開始你就要打醒萬二分精神，你拎住二三千件貨，少咁件真係死比你睇！香港飛杜拜大概要八個鐘機程！呢個鐘數其實都幾尷尬，你估真係食完個飛機餐睇兩套戲再洽個零兩個鐘就到咁美好咩？首先啲位唔荒好坐得去邊先啦，喺唔可以周圍去之下受罪嘅就係你條腰加你條頸！焚焚真係提咁多位鏈尾如果搭長途機的話一個好嘅飛機枕真係好好好重要！同埋永遠都係喺你訓得最冧嘅時候派餐架！食完你想再訓過咩？唔好意思借一借我想去toilet ！郁一郁之後成個醒晒你已經訓唔倒了～更加唔好提肥佬細路香水人了！
以為落機就係一條好漢？少年，你太年輕了！報關清關先係最麻煩。好多國家都要比奢侈品嘅税，杜拜都唔例外！所以首先當地嘅custom報咗你會帶幾多件貨，當然事前你要鉅細無遺咁準備你要帶嘅資料過佢啦！當你比本電話簿咁厚嘅資料佢就會隨手篤一件，咁你就要喺已經pack好嘅箱裡面揾番嗰件貨出尼，所以話如果想快啲離開機場去酒店訓覺的話事前功夫真係好緊要！呢一part真係可以磨你起碼兩三個鐘！甚至更耐！！工作人員手腳慢就司空見慣，比人打尖更加係家常便飯！鏈尾嘅我唔使同海關人員周旋，之但係帶住疲累嘅身軀喺出面等兩三個鐘又唔訓得嗰下係堅辛苦啫！
聽番同做珠寶行業嘅朋友仔講杜拜show係最辛苦嘅珠寶show之一，好似瑞士呀，美國呀嗰啲show頂晒壟都係8個鐘，收咗show之後你就可以食好嘢shopping ；杜拜show就10個鐘，本來杜拜星期五係公眾假期，以前就係開半日，而家照開足全日㗎！你再預個零兩個鐘去開show收show，所以你呢個trip嘅地點只係得show場同酒店！你都咪話唔攞命！出去觀光？極其量咪比你去supermarket入下貨架咋！五日擺show加兩日set場收嘢再加兩日飛行時間，真係虛脫咁滯㗎！
跟住要做嘅同香港show一樣之餘，身為鏈尾嘅焚焚呢個時候要兼任埋sales一職，因為杜拜show多零售，你當好似維園年宵花市咁，不過就中東版囉！你唔好以為中東呢啲有錢國家買嘢唔睇價錢呀！講起價上尼嘅兇狠程度拍得住啲中國大媽！完咗之後第二日就走？邊有咁易？除咗pack番自己啲嘢，啲貨跟嘟機嘅次序一樣之餘，逐件入袋，再扣埋扣針。又要準備清關夾貨嘅嘢！所以唔好以為完咗show就完，真正嘅完結係你番到香港，啲貨番到公司，第二日你返工點數又啱先係真真正正嘅完結！
所以我話係挑戰人體極限就係咁解囉！不過話雖如此，感受倒嗰度嘅文化都係一種得著！去過比較過先知香港嘅好，自由原來唔係必然！經歷過體驗過令我更加珍惜現在擁有嘅所有。今次就分享到呢度啦！如果喜歡焚焚寫啲嘅嘢，就唔好吝嗇你地嘅like，你地嘅支持就係我嘅動力。想知多啲有關珠寶嘅嘢，可以去《焚焚的珠寶鏈尾生涯》度睇下！如果有咩想問或想我寫的話，留言比我！盡量滿足大家。好吧！我地下星期一見！
帶定頭盔：本人意見並非所有業內人士之意見，如有得罪，敬請原諒。
PS． 文章最底有就個評分架！拍爛檔幫我like 一like丫～～！！
焚焚
** 博客文章文責自負,不代表本公司立場 **