特朗普上台令利息和美元向上,股市大執位。房託股大跌, 如越秀房產信託(405)轉眼已跌到4.19元, 有朋友話要瞓身買,我話買佢都至好分段買,瞓身更唔好, 因為利息上升,不利房託。
特朗普上台出現再通脹預期,但佢搞基建推高通脹會去到什麼水平, 好難準確預測,或者佢做唔到落任就俾拉咗,或者佢可以做兩屆, 無人敢講實,但以目前有限資料,有啲宏觀大走勢的預測要改一改。
第一,利息會比想像中高,原本估聯儲局一年只加得一次息, 美國十年期國債利息去到2厘左右就行人止步, 但特朗普上台改變市場想法,如今已十年期債息已到2.2厘, 來年只要通脹一升,有可能見2.5至2.8厘,聯儲局加息3次共 加0.75厘也不是太出奇之事。利息高不利收息股如房託。
第二,利息高美元亦高。原本估美元指數去到100就行人止步, 如今少少地估佢明年走多5%,高位可能到105。 美元高令新興市場資金回流美國,不利亞洲股市。
第三,人仔匯價受壓。特朗普當選後人仔累計貶了1.2%, 已經唔算多,主要發達國家貨幣貶了1至3.5%, 新興市場如出口商品為主的巴西匯價一周貶6%。 我估明年人仔還要再貶3至5%。幸好特朗普反對人仔貶值, 有助人仔唔至於跌太多,跌到咁上下美國會逼中國干預。
在這種形勢下,銀行金融股受惠,本地地產股受損, 房託收息股亦中招。房託之中,原本領展(823)對利息上升比越 秀房託(405)更敏感,但近期405跌得更犀利,另一個影響4 05的原因是人仔下跌,因為佢的租金收入在內地, 人仔跌換成港幣的盈利下降,所以市會更睇淡佢, 假設由特朗普當選到明年底跌人仔合共跌5%(現在已跌1.2%) ,又假設原本估計405的低位是4元, 單用人仔匯價下跌去調低佢低位的估計,咁就會去到3.8元, 若然利息超乎尋常地上升,可能會更低。
調過頭來說咁又係唔係完全唔好買405呢? 咁又不必,因為它始終是派高息股,去年派到7厘息, 若然收到息又走到一轉,可以有20%的年回報,睇錯都有7%息收,可以守。所以建議策略第一是調低入市位, 第二是減少它在自己組合的比重,例如原本預佢佔自己組合的50% ,就調低到25%,或者更低。講入市位,未入的可以到4元才入第 一注,3.8元入第二注,3.6元入第三注(平均價3.8元)。 若已在4.2元入一注的朋友,可等3.8元才入第二注(平均價4元)。息升對房託不利,記住不要瞓身。
可伺機增加持股比例的是滙控(005)和宏利(945), 但它們現價太貴,應會有較深回吐,可以等意大利公投、 聯儲局加息這些事件發生,它們股價下挫時才買。
現在接近入貨位的大股是中國海外(688),現價21.95元, 佢慣咗一年走吓上落,佢過去52週低位20.45元,高位28. 25元,現在好近低位,內地房價太高阿爺控一控,人仔下跌, 皆對佢有壓力,用上述分析,以人仔跌5%計,即使佢低位下調5% ,也只是19.43元,現價距離不遠。可以現價入一注,21.3 元入第二注,20.7元入第三注,入齊平均價21.3元, 若明年上番25.56元沽出,都有20%利潤。
陸羽仁
** 博客文章文責自負,不代表本公司立場 **