金多寶說故事2

命裏有時終須有品貌不揚嫁富夫

若干年前在某大日資百貨公司行街，其間同個陌生中年女人吹水，佢竟然問我：「啲有錢人响邊度識倒架？」老老實實，章小蕙嘅年紀，零打扮，仲想揾有錢人？妄想呢樣野冇分年紀。

幾年前我响一間中型公司做野，有個好肥好巴渣嘅女同事，年紀輕輕非常發奮，每逢星期六同幾個志同道合嘅姐妹落老蘭識富二代，動用微薄薪水零晨三點揾泰國師傅貼金，希望藉此嫁入豪門。

唔好講富豪咁膚淺，講下啲女人嫁有錢佬。你响銅鑼灣合埋眼一手撈起半打女，個樣都唔會太差啦，但當中又有幾多個嫁倒比有錢佬？有冇錢都想揾靚女做老婆，咁究竟幾靚嘅女人先嫁倒有錢佬？前排有個老友比左個八字我，叫我估下個女人有乜咁特別。

我吹水就叻，好彩八字啱啱跟國師學左十幾堂，加埋重温筆記同睇過下啲書，啱啱夠我金多寶班門弄斧：

X庚乙X
X午酉卯

庚金，為陽金，屬性硬物、斧頭、兵器，女命主好剛強。由於女性應該柔和好啲，因此女命主會陰陽不配，想必係男兒相頭；而且局中又沖又剋勁多，地支打仗咁，相貌性格應該都窄窄地，命運亦然。人有相似命有相同，怕大家胡思亂想，此八字部份天干地支唔寫到咁白，但會响文中提及重點，等大家睇得明。

當然，庚金日主都有靚女架，不過要有條件，就係一定要有水。女人用水造，咁皮膚先有彈性，感覺先至嫩滑，大家就當我講緊舊豆腐啦。命主全局無水，時柱其實有粒土，但係土來剋水，大運打啲水埋黎都剋走埋啦，所以命主靠唔倒流年大運變靚啲。

科技進步，後天打救，命主財多，以財生殺，用財色討好男人。咦？命主點用財同色？打扮囉、整容囉，夫妻生活情趣果啲囉，總之佢一定有計，亦會咁做。性格促使命運嘛，溝仔咁有heart，我個人好欣賞呢種咁上進嘅心態。以佢個八字黎睇，佢係成功溝倒嘅，個男人唔叫大富大貴，但一定有啲錢。

正官正印坐下，個男人係個好丈夫，錫佢，又會比錢佢洗。丈夫仲要係午火，外貌有保證！做女人放棄自己，唔打扮唔改善自己（扮野都好）等真愛？邊有野會自己由個天跌落黎吖！八字都好現實，話比大家知，唔靚唔緊要，有努力嘅性格仍然可以化腐朽為神奇。

女讀者係咪好嬲，覺得世事點解可以咁唔公平，究竟命主丈夫係咪盲架呢？佢丈夫鐘意佢咩，我唔知，好彩亦唔關我事。丈夫午火，同見庚金酉金，夫宮現兩妻，個二奶酉金喎，應該幾靚下。唔講太多，關我家事咩，搞掂自己好過。

香港兔蘆術數學會

** 博客文章文責自負,不代表本公司立場 **