經常有網友私訊俾我,問我唔同股票的前景,好多人都話自己唔係炒炒吓,係想睇基本因素買股,我就教教大家用最簡單的方式,去判斷股票未來的基本因素。
股神巴菲特決定買唔買一隻股票,係話買一隻股票,就好似入股咗間公司那樣,你真係要覺得間公司好值得投資,先至好去買。股神會估計間目標公司未來的盈利情況,推算公司未來無限咁長年期的現金流有幾多,然之後用個模式去將長期現金收入貼現,計出一個貼現價,然後睇吓現時股價,係唔係平過貼現價好多,若果平好多,先會買呢隻股票。
股神的方法好好,但你聽落都會覺得好煩,覺得自己計唔到公司未來無限咁長年期的現金收入況,咁我就叫大家用一個好簡單的方法,粗略估計吓目標股票未來三年會唔會賺錢,才決定買唔買佢。
我舉兩隻股做例子,有朋友揸咗有線寬頻( 1097 ) ,公司用供股的方式引入新股東永昇,有線普通股東都要決定會唔會按每3股供5股的方式,以0.21元供股價去供股。
我俾個建議,有線供股價0.21 元,雖然比佢現價0.345為低,但係我都唔會去供股,情願將供股權賣咗出去,因為按3供5比例去供股,攞住3股價值1.035元,供5股即係要比1.05元,要投入多1倍資金入去,銀碼好大。你估佢未來3年,會唔會賺錢呢?
電視業競爭激烈,有線寬頻去年蝕緊3.1億,而家開埋免費電視台,開支更大,廣告又唔見得多,係咪會蝕更多呢?如果繼續蝕錢,佢供股供一次估唔夠,將來要繼續供,未來幾年可能都係一個無底深潭,咁點解仲要放更加多錢落去供股,即係對一隻蝕錢股不斷增加投資呢?有錢何不買其他更有前景的股票。
另外有朋友問我中信大錳( 1091 ) ,呢隻係一隻資源股,同鋼鐵業有關,過去5年蝕了4年,只在2014年微賺1549萬元,其餘年份都係蝕錢,去年蝕8791萬元。
中信大錳過去業績唔好股價亦差,但在2015年股市高峰期時,佢曾經最高炒返上1.69元,之後碌翻落來,這兩年長期在0.5上下徘徊。不過最近有些變化,佢公布中期業績,今年上半年營業額有27.5億元,較去年上升115.3%。上半年純利7000萬元,相比2016年上半年蝕1.4億元,大幅改善。另外上半年它的一間聯營公司配股,被視作出售聯營公司,出現非現金虧損6940萬元,若扣除此筆非經常性虧損,上半年的盈利有1.4億元。
有網友早年在1元的價位購入中信大錳,坐了艇,最近見股價因為業績改善型已回升超過10%,現價0.55元,問股價回升了,好不好沽出止蝕。我就話唔坐艇都坐咗這麼多年,中信大錳今年虧轉盈,半年實質有1.4億盈利,若朝這走勢發展下去,全年可能有跟2億多、3億元盈利,現家市值18.9億元,若估計盈利3億元計,估計PE是6.3倍,若估計盈利是2億元,估計PE是9.5倍。以一隻虧轉盈的股票來說,未來股價還有上升的空間,既然坐艇坐了這麼長時間,何不再等一會。
我希望用這兩個例子說明,是否買入一隻股票作中線投資,可以好簡單地估計它未來3年,公司盈利是保持、增長、抑或倒退,又或者持續虧損。估計未來盈利會持續增長的股票可買,估計未來會繼續大蝕的股票要沽,即使有人告訴你有新股東入股有線寬頻有何概念,但恐怕也是炒炒概念,不易實現。
陸羽仁
** 博客文章文責自負,不代表本公司立場 **