*

upload_article_image

蔡伯勵預計狗年運程麻麻 樓市有壓力 科技一枝獨秀

年近歲晚,大家開始關心未來狗年的運程,堪輿界翹楚蔡伯勵昨晚和一班老友食飯,Sebastian 叨陪末席,聽蔡伯勵預測來年戊戌年香港運勢。

蔡伯勵對Sebastian講,來年係相當嚴峻嘅一年,社會上會有唔少爭拗出現,政制有壓力,地產有放緩跡象,金融界則平平,只有科技界就一枝獨秀。

蔡伯勵分析戊戌年係「木火流年」,話地產有放緩跡象,「商業上平常啦,因為地產都係一個支柱,唔會壞得太交關」。

20180113_CR_Feng_Shui (1)

蔡伯勵估計明年香港運程麻麻。

佢話股市在農曆年前仲得,之後2月尚可,不過往後就麻麻地。對於近日股市升勢強勁,蔡伯勵笑笑口話:「你話更高到三萬五呢,我就唔敢睇,或者會慢慢放緩都未定」。

20180113_CR_Feng_Shui (2)

蔡伯勵對股市唔會睇得太高。

整體嚟講,蔡伯勵覺得戊戌年適宜保守,唔好過份進取,「有得變化又好,無得變化都好,出年都係保守,你話過份個個睇好,我就唔敢睇好喇」。但佢又話,近年人事氣貫長虹,可唔可以人定勝天,都係未知之數。

20180113_CR_Feng_Shui (3)

佢仲話,今年新曆元旦嘅八字同農曆年初一嘅八字尚屬平穩,而香港地處東南,佢覺得流年得乎天時地利,如果喺人和方面可以上下一心,團結一致,互愛互助,取得共識,社會穩定性可能可以勝其他一籌。

席間有人問起律政司司長鄭若驊的僭建風波,問鄭若驊會唔會落台,蔡伯勵對鄭若驊的評價甚高,佢估計冇問題。

Sebastian

** 博客文章文責自負,不代表本公司立場 **