壹傳媒主席黎智英以3.2億賣《壹週刊》不成,近日在壹傳媒內部密密講話,穩定軍心。
據說肥佬黎分別在台灣和香港對員工講話,他承認過去用人不當,佢如今重新返壹傳媒上班,一星期返三日工,帶領公司重新上路。
肥佬黎在2014年佔中後辭任壹傳媒主席,只做普通股東。但去年12月15日突然再任壹傳媒的非執行主席,由今年2月1日生效;當時同時宣佈行政總裁張嘉聲將會退任,由副行政總裁、《蘋果日報》社長張劍虹接任。
肥佬黎換了CEO兼自己出山,做非執行主席做到一個星期返三日工,必有所圖,但大家估佢唔到,他唔係要大力搞網,原來想搞番好紙媒,最新態度是「紙媒有得做」。
尤記得2015年7月壹傳媒決定將屬下的《忽然1周》停刊,行內對這個消息十分錯愕,因因為《忽周》當時銷6萬多份,雖然銷量下跌了,仍是全港銷最高的雜誌,《忽周》的行政總裁趙偉堅在向員工公布停刊決定時,也講不出為何要停刊,只能無奈地叫員工去問老闆。
當時壹傳媒內部流傳一個說法,話肥佬黎認為紙媒無得做,即使部份高層認為可以繼續出版《忽周》試闖新路,肥佬黎都斷然拒絕,認為《忽周》好似一隻死豬在輸送帶上送去屠宰,你摸佢暖暖地想去救佢,其實無用架啦,佢死咗啦,咁好心裝注香俾佢仲好啦。
當時呢個「死豬論」太深入民心,在壹傳媒流傳甚廣,做紙媒的人人自危。但到今天肥佬黎來一個180度華麗轉身,改口話「紙媒仲有得做」,而且話要將目前香港《蘋果日報》的發行量做番上去,由現在只得12萬份,做番上20萬份咁話。
壹傳媒員工聽到肥佬黎的新觀點,話信住一半先,因為老闆思維轉得好快,有時未必跟得咁貼。但早前壹傳媒裁緊員搞外判,而家話「紙媒仲有得做」,斷估紙媒就唔會再裁員,都算係過年前一個好消息。
小鯊
** 博客文章文責自負,不代表本公司立場 **