大埔發生致命巴士車禍後，特首林鄭最後在周一決定，停放年初二煙花，是次決定泛民讚好，但也有反對聲音。
政府決定停放煙花之後，泛民議員毛孟靜就在臉書專頁上，貼出帖子，登出民主派議員要求政府取消年初二煙花匯演的信件，大有攞彩的味道。有評論認為，政府果斷決定，停放煙花，應可攞分。
圖: 毛孟靜facebook
不過，政府取消煙花匯演，亦都打亂好多人的部署。有網民在網上留言，話佢嘅好朋友爸爸末期癌症，得幾個月命，成世流流長未嘆過，好朋友一年之前，為滿足爸爸最後心願，在北京道一號，訂了個窗邊煙花景廳，同爸爸食最美麗晚餐，價值兩萬。而家取消咗煙花，朋友的心願，亦都無辦法達成。
另外唔放煙花亦都唔等於好環保，或者節省了金錢，因為今次本來打算放的28999枚煙花，亦都要善後處置。負責放煙花的製作公司會和政府商討，如何銷毀煙花的安排，按2014年10.1取消放煙花後的安排，是在大鴉洲以點燃方式，銷毀煙花，今次估計都會用類似的做法。
另外，煙花放唔成，一眾煙花船河活動，或者相關的旅行團或酒店訂房，都要取消，究竟可唔可以退錢，而家仲未搞清楚。
政壇八卦友就話，取消農曆年放煙花，表面睇好似取消歌舞升平的活動，可以博得掌聲，但亦都有好多人受影響，亦都會有一些罵聲，埋單計數，取消煙花對政府民望亦都唔會有太多着數。
Ariel
** 博客文章文責自負,不代表本公司立場 **