作者：國紫平

好多人問我點解會學玄學，不論係中、小學同學或公司既經理同老細都係咁問 。因為90後而家最多咪廿幾歲人 ，呢個年紀多數係掛住打機、去吓旅行、得閒就溝仔溝女、同上去高登食吓花生。

但人大左會諗下人生係咩一回事，加上自己細路仔時健康麻麻，變左成日入醫院，影響左讀書成績。同其他人比，我係輸在起跑線，所以對人生有一種不甘心既感覺。

當一個人好運就會覺得自己好勁，覺得揾錢好易，而其他人揾唔到錢，只係因為佢廢 。但當你行衰運既時候，只會話自己行衰運，而唔會話因為自己廢。

當我進入玄學既世界後，先知人生有好多野都可以揾到答案。聽個過一個後師傅話「一入玄門深似海，非等閒人莫進來」。算命係算人生，既複雜又簡單，簡單既係指算「妻、財、子、祿」，但要道出經歷當中既情感起跌，就十分複雜啦，我地命理師既責任係指出當中既好壞。

從學「紫微斗數」到「子平八字」既學習生涯，令我對事物有了深一層既新睇法 ，例如：工作上別人十分懶散，但卻連連升職 ；反之有人勤力過隻牛，卻仍原地踏步；有d人揾錢好易，有d人要打兩份工先維持到生計，當中運既影響好大。

從開頭話我迷信、不學無術既朋友，變成而家會時常揾我問事既人，當中我下左好多苦功。試過去討論區免費幫人論命，又不停找身邊既朋友拎八字，亦面對過好多古靈精怪既問題。遲下再同大家分享當中既趣事。

「落地喊三聲 ,好醜命生成」，當我地改變唔到出世既時間，唯有改變自己既心態。最後發覺「緣」來自己好有用，命好命壞自己定。




香港兔蘆術數學會

** 博客文章文責自負,不代表本公司立場 **