點忙都好，做老公當然要夠浪漫吧！
陪老婆試衫？無問題吖
石修兒子陳宇琛（Sam）近日既要拍戲，又要主持音樂節目，工作雖忙，但新婚半年的他，一有時間便會陪嬌妻林佑蔚（Camille）行街食飯撐枱腳。早前二人在銅鑼灣百德新街shopping，只見阿Sam陪老婆睇衫和試衫好體貼；之後再去隔籬食街的餐廳吃晚飯。期間兩公婆有講有笑，仲黐到實一實鬼咁sweet，食飽後便十指扣緊離開。
去年二月，阿Sam與拍拖逾兩年的前有線主播Camille，在牧師見證下簽字註冊結婚，同年8月豪花6位數字在蘇格蘭愛丁堡舉行古堡婚禮。曾是職業舞蹈選手的Camille更秘密練兵，在晚宴上向丈夫大跳辣身舞送驚喜。由於他們仍有很多工作要做，所以想衝刺多兩年、過多陣二人世界才生BB，因為有了小朋友，又是另一種生活，難得今年就70歲的石修，都冇催他們急住抱孫。
早前不用開工的Sam陪Camille到百德新街買衫，他們先去Sandro掃了袋衫，Camille見未夠喉，阿Sam再陪她去附近店舖繼續睇。可能天氣凍，只見Camille係咁試大褸，不過睇咗半個鐘都係冇買，但阿Sam仍好有耐性地在旁等候。行到晚上8時，他們便急急腳到食街搵間餐廳撐枱腳。他們情有獨鍾食西餐，並點了湯和沙律；其間二人有傾有講，更黐到實一實睇片好溫馨。逗留了約1小時，阿Sam便拖實Camille搭車返家。
