*

upload_article_image

劉青雲放假做住家男 照顧父母兼與老婆拍拖買餸

青雲和Amy廿年如一日都這麼恩愛~

影帝劉青雲早前孖張家輝、林嘉欣等拍完英皇電影《廉政行動煙幕》後,近日終於可以休息,做Family man陪家人。

放假中的青雲先孖老婆陪年老父母去中環睇醫生,然後阿仔細心逐一扶兩老上車,勁有孝心。

日前下午3時許,青雲和太太郭藹明(Amy)現身中環置地廣場。當日兩公婆帶外傭陪同80幾歲的青雲父母上中建大廈睇醫生。睇完醫生,一行人落樓等司機,青雲貫徹其低調作風,戴口罩遮樣,其妻就戴黑超,兩公婆分頭mark實長輩,照顧有加。未幾,七人車駛至,青雲馬上行前扶餅印媽上車,再折返湊扶枴杖的爸爸,安頓好家人,最後才坐上司機位旁,先送兩老回家休息,再孖太太坐車往中環ifc超市買餸,畢竟有個廚藝高手老婆,當然不用出街食味精飯!

兩公婆一起揀龍蝦。

另一日中午12時,青雲以黑衫、鬆身褲同一裝束示人,兩公婆再拍拖出動行ifc的city'super。這天愛吃住家飯的青雲體貼黐老婆買餸,二人推車仔先去揀海鮮,見到龍蝦好生猛,馬上叫職員揀隻打包,然後再買蝦,再轉去揀火鍋的鮮肉配料,安格斯肥牛、豬肉片等,最後買湯包,相信是日晚餐一定是龍蝦火鍋!難得有老公同行,Amy一次過買多兩餐餸,又揀洋蔥、蔬菜、生果、韓式辣醬等,買到裝滿整個籃滿,就排隊付錢。崇尚環保的Amy還即時拿出兩個環保袋,好抵讚!最後,人妻快手買幾個麵包,再會合honey落樓等車,返家煮飯仔。

50歲的郭藹明仍然保養得宜。

碩士畢業嘅學霸郭藹明(Amy),91年成為三料港姐冠軍,98年嫁劉青雲後一直做其背後的女人,更負責管財投資錢滾錢,打理家頭細務又學煮餸煲湯。早排,廿四孝丈夫趁住6月17日二人結婚20周年紀念,大手筆買過百萬波子冧老婆。

結婚20年的青雲和Amy早有共識不生小朋友,過幸福二人世界。