*

upload_article_image

容祖儿放假前卖大包 农夫搞笑Chilam接力上台

祖儿的粉丝真幸福~

容祖儿红馆个唱踏入第14晚,她先与细佬容逸恒在红磡360上对唱,嘉宾更是打孖上,请来农夫及张智霖助阵。

容祖儿

容逸恒

农夫上台大展搞笑本领似小型栋笃笑,一开始就玩大踢爆,“其实扮咩惊喜,大家一早知我哋系今晚嘉宾啦,好多人收到whatsapp嘉宾list ,你地都知啦,下场系草蜢!”C君:“我收到,18号农夫,我睇到几嬲!”祖儿话:“我一早就已决定请你哋做嘉宾㗎啦!我觉得你两个好OK㗎!两个天生一对,一个咁高,一个冇咁高。一个长期唔够饭,呢个食埋佢个碗饭。”陆永:“揾我哋咁样先够crazy系咪?你之前全部巨星,原来容祖儿你真系痴线㗎!”C君:“我作为你嘉宾,要同全场观众负责,好想讲一声 :‘对唔住,好抱歉’,你谂下,大家之前睇个啲张学云友、刘德华、古天乐,跟住今晚系农夫!你话点算呢真系!”

容祖儿、农夫

祖儿就叫农夫听下观众的反应,观众纷纷狂欢呼撑农夫,但两只死仔就笑道:“今时今日闹同赞啲声系差唔多...”;C君续谓:“我抱歉自把自为应承祖儿做嘉宾,我哋应承大家多一件事,今晚我哋唔再唱任何歌,唔再折磨你哋听觉,请放心。”然后两人一同抵死唱《刻不容缓》,说:“我‘无自信,人云亦云’,所以我哋两个咪系娱乐圈到‘庸庸碌碌半生’。”观众报以热烈掌声。C君再讲:“如果在座任何朋友想退飞,唔需要唔好意思,我自己都退咗,我睇到今晚嘉宾农夫,我帮你哋谂埋,你点面对睇之前个啲嘉宾啲观众,你谂下一齐食饭,你朋友问,你𠮶晚边个嘉宾?人哋话张学友,你话农夫,几难听,两个垃圾。”

容祖儿、农夫

祖儿就直头笑到收不到声,不懂回应,只好说:“你哋唔好咁样话自己,千错万错,系我错。” 陆永:“你哋唔好怪Joey,佢系我认识最锡歌迷嘅歌手,佢锡嘅程度系非常crazy,crazy到自己假期都唔要,补番场畀你哋!咁锡你歌迷,咁今晚系咪要补?咁嘅嘉宾,嘉宾衰成咁硬系要补啦!”又引得观众哈哈大笑之余更热烈起哄欢呼!

容祖儿、农夫

C君:“大家知道,容祖儿pretty crazy演唱会,其中最crazy就系尽量希望唱多啲歌畀大家,真系pretty超时!有数得计,每晚大概罚5万,做完场骚,最少都罚100万。哗!系我就唔唱啦!我最想试下8点半开骚,我8点9散场,测试下红馆over要补水,咁under有冇得回水?”陆永:“容祖儿你点解咁对歌迷,你简直系荼毒香港乐坛,你开演唱会开成咁,咁大制作,叫人哋以后点开演唱会?睇过呢个骚,重点睇其他骚? ”然后反问观众:“所以好多人都话最好睇演唱会系边个?”观众狂叫 :“容祖儿!”农夫就叫观众齐齐“举高只手”,大合唱《举高只手》作结。

容祖儿、农夫

农夫离开后,祖儿就好开心同观众讲:“我想话畀大家听,我好努力做咗14场,听日我放假。今日阿姐好高兴,决定卖大包,演唱会每晚我都会唱人哋歌,满足自己欲望,今晚准备咗一首我好喜欢的歌畀大家,希望大家会钟意呢首歌,然后祖儿唱出《祝君好》。在观众没有心理准备下,张智霖(Chilam)突然升上台同祖儿合唱,无端端又多个靓仔嘉宾睇,观众开心到飞起,疯狂大叫,祖儿就话:“今日想请大家食多粒糖,不是我想请就得,要请得郁先得,大家畀多啲掌声多谢张智霖!”

张智霖、容祖儿

两人在台上更披露不可告人的秘密,Chilam话:“我哋两个关系,正所谓远亲不如近邻!”祖儿:“今日披露大家知一个秘密!你哋唔好同人讲,我哋系同居关系!哈哈!不过,同居,不同层!我哋住同一大厦,见得佢最多系停车场同电梯,同舞台真系第一次!好多谢Chilam,佢拍紧贺岁片,请几个钟假嚟支持我,重携眷出席,老婆靓靓(袁咏仪)都嚟埋睇骚!真系多谢佢一家。”

张智霖、容祖儿

Chilam话:“我有个小秘密想话你知,我个仔撞到你几次,佢好怕丑,你出咗电梯,佢就问我:‘Who is she?”我答佢:‘She is a diva!’,香港天后,i’m proud of you!系缘份令我哋friend咗咁多。”祖儿见观众咁兴奋,就拉住Chilam唱多首歌:“大家咁多开心,我带个靓仔一齐同你哋握下手,再唱下歌啦。”然后两人同观众一同合唱《岁月如歌》,气氛热闹。

张智霖、容祖儿

张智霖、容祖儿

袁咏仪、容祖儿、张智霖