*

upload_article_image

黎耀祥唔介意内地剧降做男二 买重马明惠英红夺视帝视后

祥仔睇好马国明同惠英红!

祥哥睇好马明搭红姐成为今年视帝及视后

三届视帝黎耀祥为咗出外见识吓,去年5月同TVB转签部头合约。虽然唔再系TVB“亲生仔”,但祥仔第一部内地古装剧《凤弈》依然获TVB安排喺台庆月播出。因为无份角逐视帝,祥仔冷眼观战,分析得更加独到和精准,凭他智慧拆解,今年台庆的视帝视后,七成机会落喺马国明同惠英红手上:“观众眼中嘅马明系天然呆,喺《白色强人》演医生真系好啱好着数;至于小红姐论资排辈,论实力一定冇人敢同佢争!”

马国明同唐诗咏喺《白色强人》𠮶段情,观众睇得好投入。

影后小红姐《铁探》一出,视后一定系嚢中物。

黎耀祥笑谈做男二好处多箩箩,休息又够,挨得唔辛苦,准备又充足,主角拍到攰先到他埋位拍,好似打拳咁,他梗系赢啦。

有情有义的黎耀祥为撑昔日合作过《西游记》及《巾帼枭雄》系列的编审张华标,答应北上演由标哥编剧的内地古装剧《凤弈》,仲唔介意做男二,畀徐正溪(即周丽淇前男友徐正曦)担正。由三届视帝“降呢”,祥仔竟唔觉系屈就:“我年纪大啲,成熟啲,唔似得有啲后生咁嚣张,胜利冲昏头脑自以为是,老实讲,我一生人做主角只系近十年八载嘅事,做路人甲同埋男配反而做咗咁多年,我系唔会有做大明星嘅感觉,或者将自己摆喺主角嘅位置,系我眼中界定作为演员,无论系乜位置,就算系客串,只要做好个角色就经已好满足,否则根本挨唔到廿几年,应该好快会放弃。而且大家要清楚厘定配角岗位,其实系配戏畀人,每次演出都一定起发挥作用。”

祥仔和“皇后”曹晞文有好多感情交流戏

内地演员徐正溪(即周丽淇前男友徐正曦)为祥仔庆生

遗憾雯女演唔到

就算今次做男二,但祥仔好有戏做,非常抢戏:“朗坤呢个角色似系嚣张跋扈嘅奸臣,其实只系想喺宫中巩固实力嚟保护皇后,因为佢哋有份细水长流纯纯嘅爱,关系微妙,感情变化比《巾帼》、《义海》更多。因为《凤弈》系《巾帼》系列嘅延续,标哥有打过邓萃雯主意做皇后,但中间有问题倾唔成,都有小小遗憾。计落我喺《无双谱》后5年冇拍过古装剧,哈!我都唔太接受自己古装个样。唯一有趣系古装剧唔实在,唔使交待角色背景,会有好多嘢玩。”

黎耀祥和邓萃雯演《巾帼》系列大受欢迎,可惜今次未能再续前缘

欣赏马明好乖仔

今年TVB将台庆颁奖礼押后到明年1月才举行,暂时祥仔冇剧角逐,可以喺零压力下考吓眼光。他先利申:“因为好多戏跟唔足,只能客观地去估计加小小人情分嚟推断,计我分析马国明拎视帝机会最大,佢个人老老实实、呆呆笨笨,喺《白色强人》度做啱咗角色,成日觉得演员系要配合角色外型同感觉,观众先会投入到,喺病人视觉,医生唔会古灵精怪,依牙松杠,搞搞震,马明嘅呆笨就变成佢演医生嘅沉实能力。(系咪个个小生都攞过晒,排队都应该轮到佢?)TVB又唔系对佢唔公平嘅,其实竞选都要讲吓运气,正如唔系年年港姐都好靓。马明唔好彩,年年遇到强敌,强攻黄秋生、黄子华边个都死啦。不过,我唔使鼓励佢加油,因为佢一啲都唔落寞,以往佢好乖仔唔花费,哈!依家我望到佢转晒新车呀,又住太古城,我都睇你哋爆料咋。”

黎耀祥有5年冇拍过古装剧,对上一套系《无双谱》。

山聪浩信机会微

至于陈山聪被视为黑马,祥仔坦言:“虽然佢喺《金宵大厦》人气好爆,系贯穿成套剧嘅主角,但单元剧好多,演出上少咗个优势,佢同李施嬅喺呢方面都比较输蚀。王浩信嘅《解决师》回响又唔算太大。在公在私,客观评论,马明机会最大。视后点都系畀小红姐,虽然佢唔系亲生女,但佢会同TVB再拍㗎嘛,而且家市场唔同咗,个圈扩阔好多,自己人愈嚟愈少,尤其有资历嘅自己人,吓吓签到10年先系自己人咁就死梗喇。”

黎耀祥好注重家庭生活,现时同无线转签部头合约,可以经常去美国探仔。

陈山聪、李施嬅主演嘅《金宵大厦》虽然好爆,但当中单元剧太多,呢方面都比较输蚀。