*

upload_article_image

恐怖脑膜炎生死搏斗168小时 韩马利死过翻生要享受人生

身体健康最重要!

人生无常,对险死的韩马利(Mary姐)来说有深切体会。今年八月,65岁的Mary姐因脑膜炎在医院昏迷了一周,Mary姐同《头条新闻》讲,原来当时相当危险,一只脚踩咗入鬼门关,连医生都话:‘好少咁大年纪仲患脑膜炎,会比较棘手。’对症下重药三星期,冇咗炎症,但接下来还要面对脑部受损后引发嘅种种后遗症,包括有轻微抑郁症、气虚血弱同埋脑筋迟缓等状况。执返身彩的Mary姐坦言唔怕死更有感而发:“唔知余下日子仲有几多,要过有质素、有意义嘅生活,要丰盛人生。以前冇做过嘅事,亦要补偿返畀老公,至少要多啲去欣赏佢。”

入院相经过美图,所以Mary姐尚算见得人。

韩马利忆述死过翻生经历,笑中带泪。当日急病暴瘦,入院时一脸憔悴病容。

呢场生死搏斗喺今年八月发生,面黄黄的Mary姐忆述时犹有余悸:“好记得𠮶日凌晨出发,抱病同老公杜燕歌去内蒙古做嘢,当时个身滚滚地烧得唔算严重,以为只系普通感冒啫,啪粒成药就冇事,点知两日后返港仲未退烧,好彩我顺老公意去睇医生,医生建议我马上入院,当时我仲未知死,怀疑医生错判,最后印象坐上轮椅搞入院登记,之后发生乜事就唔太清楚,因为经已陷入昏迷状态,断晒片!”

患病期间获好多朋友支持和鼓励,黎美娴到过医院探望。

患病后两公婆由以往“同屋住”关系变返相亲相爱,呢期仲孖住拍福音电影,她形容喺未来日子每日都要过好日子,唔好再同老公顶颈。

Mary姐昏迷一星期后稍为有返意识,“原来喺头7日未断到症嘅日子,我嘅病情相当危急,严重到神智不清,要抽骨髓嚟化验,但咁痛我都冇知觉。老公当然好惊,不知所措系咁喊,话宁可我好似以前咁成日驳佢咀!探过我嘅朋友话,当时我讲嘢语无伦次相当恐怖,问埋啲奇怪嘢,嚷着话执行李走,要赶去拍剧集《唐人街》(其实套戏已拍完),又反问护士点解唔畀我走?我只系嚟探病㖞!甚至一日偷走过两次,又试过突然走入厕所,除晒啲衫话要冲凉,吓到护士飞奔入去帮手。医生见我神智好唔妥,决定安排我照磁力共振照吓个脑,最后确诊系脑膜炎,估计因为我有几日去唔到厕所,细菌排唔出体内上咗脑,所以家我好重视便秘问题。”

Mary姐大病前赶拍剧集《唐人街》,呢个系临死前的造型。

韩马利畀蚊叮后伤口发炎,老公唔抵得她只系贴块胶布,好紧张咁帮她消毒,再贴胶布。Mary姐冧爆说:“我宁可佢一直当我未好返咁对我。”

Mary姐吊咗三个多星期抗生素,虽然一日比一日清醒,但开始发觉脑部转数变慢,唔识揿电话回复朋友讯息,个人又晕陀陀,好攰好攰,起身15分钟就要瞓返落牀,真系执金都冇力,原来要面对好多后遗症开始识惊:“我几日几夜食唔落嘢,吞极都吞唔到,每次食嘢好想喊,老公好担心我要插胃喉灌食,猛劝我食小小粥水,因为又瞓唔到,个人好虚脱,好负面,好恐慌,而且手震、脚震,要老公拖住行,甚至瞓到半夜全身出汗,但系咁打冷震。医生讲明唔可以再病,一病就救唔到我,老公怕我冷亲,成晚帮我全身摄干毛巾吸汗。后来经教友介绍再睇心理医生,评估我因为脑膜受损影响有轻微抑郁症,要食六个月血清素控制,加埋高剂量维他命C及补脑补充剂,现时食得瞓得,由最瘦得返46KG回升到50KG,虽然记性仲系差小小,尤其系唔记得人名,但我当自己好返晒。哈!我谂我暂时拍唔到古装剧,做唔到专业律师、医生、法官。脑科医生话最快要等半年畀个脑康复,叫我惟有打多啲麻将。”

韩马利可随时复工拍剧,但暂时背唔到专业人士,好似法官、医生等专业对白。

当日韩马利病到笑唔出,冇晒精神,虽然当时突然有好多job招手,但真系执金都冇力。

Mary姐因为病而拉近了两公婆的关系:“今次变相系祝福,发觉原来老公好细心,结婚三十年从来未见过佢对我咁紧张,服侍周到,朋友提供健康餐单,佢就照办煮碗整畀我食,如人参炖汤,后来睇中医先知𠮶个阶段虚不受补,所以食到我…哈哈…老公仲祷告话宁愿啲病畀晒佢,因为老婆唔识得照顾自己㖞,好感动,以前佢有乜嘢都唔表达出嚟,我系男人性格,佢唔讲我鬼知咩。回想返老公试过发高烧入院,我坐咗阵就话赶住去开工,佢怪我冇煲过嘢探病,三日后仲要自己出院,但我以为佢小题大做喺度玩嘢;我又冇陪佢做激光打肾石手术,当时我开工开得密嘛,见佢冇事咪返工囉!呢啲老婆咪衰囉,边度会衰成咁,家倾返我有同佢say sorry㗎,以后我都唔会成日投诉佢,尽量唔会驳佢咀。”

杜燕歌好细心,即买Puzzle、象棋、大话骰畀韩马利玩,等她用多啲脑。

讲返自己系“衰”老婆,韩马利一味丧笑,相当唔好意思,然后补充话,其实打理屋企都头头是道,要乜有乜,仲会亲自做家务,尚算合格。