*

upload_article_image

离TVB卖生果揾到食 乔宝宝入行13年劲赚千万

都可算丰收

因为under show,本身跟TVB还有一年生约的乔宝宝决定唔再留低,提早于10月离巢,与TVB结束13年多的宾主关系。虽然唔舍得,但成年冇工开都唔系办法,趁明年4月返苏格兰慰妻前,乔宝宝尽力丧赚在港的最后一桶金。日前勤力宝宝拉埋陈蕊蕊去将军澳厚德街市做sales,力推最新引入的韩国提子,宝宝仲喂蕊蕊食,大赞提子大大粒,又甜又爽似足蕊蕊咁正㖞,两人你一句我一句,话咁快速销咗几箱。

乔宝宝拉埋似韩妹嘅蕊蕊及韩国农业部部长到街市推广,笑言食完提子会好似蕊蕊咁靓。

乔宝宝喂34F嘅蕊蕊食大大粒提子时,个样好鬼马。

原来由引入新品种提子到策划推广,乔宝宝都有份构思。他向《头条日报》坦言少咗大台遮荫,乜都要“跑数”:“市道真系麻麻,工作量唔多,好彩水果生意几稳定,都占咗我一半以上收入,而家唯有行多几步,谂啲新嘢可以刺激吓经济,同埋刺激一吓自己个荷包。呢款提子应该系全港独家,靓水果大家都会食,都有商机嘅,所以就算之后长居苏格兰,生果生意都无意撤资,而且大老板好好,仲答应分多一成花红畀我。”

2005年,乔宝宝参加《残酷一叮》入行。

乔宝宝好快返苏格兰陪乔嫂嫂。

乔宝宝入行前于惩教署任职至二级惩教助理,2005年参加《残酷一叮》,06年正式入行,他坦言这13年来劲赚1000万,都算系大丰收:“不过8成收入归老婆,自己只得两成,佢储蓄畀小朋友,亦会畀娘家,我一向唔问由佢发挥啦,反正系多余钱,咪畀佢囉,有时我有需要用钱问佢拎,佢都唔会问长问短,大家讲个信字。不过,我唔打算50岁退休,各大平台第日有嘢做都会返嚟,过到去苏格兰好想同乔嫂嫂周围玩,兼且好想凑孙。最安慰系大仔印度豹Inderpal好勤力,已持有两个物业,我喺苏格兰有经营餐馆,三餐饱饭OK嘅,都唔愁下半生。”

大仔印度豹Inderpal与医师太太Manjit结婚,乔宝宝两公婆安乐晒。