*

upload_article_image

乔宝宝返抵苏格兰隔离 有几声咳好惊中招

乔嫂嫂超好服侍,一日三餐有鱼有鸡送到宝宝的隔离房门口,堪称五星级隔离生活。

新冠肺炎全球大流行好易中招,香港土生土长嘅印籍艺人乔宝宝喺3月26日已顺利返抵苏格兰“交人”,但坐完长途机后翌日出现喉咙痛病征,仲有几声咳,宝宝坦言都几惊,觉得好攰,无神无气摊喺床嘅宝宝表示:“好彩饮咗几剂乔嫂嫂炮制嘅姜黄粉牛奶后病情有改善,但仍然密切监察中,唔可以掉以轻心。”虽然要隔离,但乔嫂嫂超好服侍,一日三餐有鱼有鸡送到宝宝的隔离房门口,堪称五星级隔离生活。

阳光普照 好彩到第3日病情好转,加上阳光普照,宝宝心情靓返晒。

自己洗烫 独自在后花园洗衫,晾衫“食自己”。

返抵苏格兰享受家庭乐的乔宝宝正展开14日嘅家居隔离生活,成面须根的乔宝宝拍片分享“禁闭隔离14日无福利”的生活:“乔嫂嫂同我讲:‘呢张床系你㗎喇,呢14日你食自己啦!’佢搬咗去同细仔瞓。朝朝起身就探热,睇吓有冇烧,因为返到嚟第2日有小小喉咙痛同咳,都以为濑嘢,所以老婆出入送餐时,我都要戴住口罩,费事传染到屋企人。”

打发时间 宝宝每日就系摊喺床上上网,他坦言最爱香港,最好两地都住吓。

隔门吹水 乔嫂嫂送爱心餐入房时,宝宝隔住两道门和细仔吹水。

古法配方舒服晒
因为饮咗老婆的爱心姜黄粉牛奶,宝宝舒服返晒。“呢个系医伤风感冒同关节痛嘅古法配方,一杯350ml牛奶加一汤匙姜黄粉就得,姜黄粉我多数喺印度店舖买,再落啲蜜糖咁会好饮啲,瞓觉前饮就最有益,但我都有密切监察住,睇吓病情有冇再严重,事关平日我都会有几声咳,而且冇发烧又冇肚屙,冇理由得几声咳就去求诊。”闷闷地的宝宝自拍独守空房状况,佢透露平时喺“隔离睡房”上网,或者打电话畀亲友解闷。宝宝笑言以往好少打畀亲友讲电话,“佢哋唔知我闷,仲赞我好有心。”

爱心正餐 乔嫂嫂炮制杂豆茄汁姜黄意粉,乔宝宝当然赞好味。

冒险坐机 喺疫情下坐飞机都几高危,好易中招。

自己洗衫自己晾
宝宝房间对面就是细仔房,为安全起见,佢同细仔要隔住两道门倾偈。“佢间房设备非常齐全,有电脑同电视机,仲好过我,不过我都ok嘅,独享套厕,仲有淋浴间,虽然有须刨,但我冇剃须,呢度都唔使见人。”语毕,他打开大柜检视:“平日会见到乔嫂嫂啲靓衫,家得返我𠮶啲。”镜头一转去到后花园:“老婆锁咗我喺后花园叫我自己洗返自己啲衫同自己晾埋,呢度啲衫全部系我嘅,咁都啱嘅,最惨要自己烫。每次都要清晒场,我由后门入去洗衫,乔嫂嫂唔畀我由正门出入,佢话:‘呢两个礼拜你都冇运行!’”

人生转捩 2005年乔宝宝因参加无线节目《残酷一叮》而入行。

隔离餐单好丰富
宝宝坦言返到屋企,见到屋企人好开心点会闷吖!虽然只系远距离见过大仔“印度豹”及医师新抱仔,但都开心到晕,唯一喺隔离期间未见过年老妈妈。他又指乔嫂嫂一日送上三餐,餐单有咖哩鱼、咖哩四季豆、咖哩鸡配薄饼及意粉,仲有香料奶茶及姜黄牛奶加蜜糖:“我唔使讲想食乜,佢会自动自觉,佢知我钟意食乜饮乜,一日三餐都提供唔同食物,我梗系话佢整得好味啦,又唔使我下厨,总之舒服过住五星级生活。”

家居隔离 隔离初期乔宝宝有几声咳要饮姜黄粉牛奶,日日要量体温,进行医学监察。

威猛大仔“印度豹”曾经探班,企喺陈展鹏隔离, 6呎2吋高人一等。