*

upload_article_image

政府回水一万众星各有使法 多人捐募助弱势

助人为快乐之本!

政府现金发放计划已陆续有市民收到一万蚊,首批合共派出315亿元,是本港最大型的一次过派钱计划。

家燕姐 “今日疫症又爆发,好惊呀!𠮶一万蚊用嚟买防疫用品,好似口罩、清洁消毒剂,希望疫情快啲走啦!先排我都捐咗啲口罩畀老人家,佢哋真系有需要。”

政府派钱,好多艺人都有申请。

黄翠如 “因为我领养番嚟嘅狗仔小六只脚有事,要长期打骨针,所以有咗呢笔钱,就会当系佢嘅保健基金!”

黎耀祥 “𠮶一万蚊当然要刺激消费使咗佢啦,《杀手》喺8月7号大结局,最好用嚟请《杀手》台前幕后食饭睇大结局,如果几个同剧主要演员,好似陈豪咁,一齐攞埋嚿钱出嚟请食饭,仲可以食豪啲,呢个安排系咪好Perfect呢?”

森美 喺疫情期间曾经成为隔离家庭的森美原先话冇谂到一万蚊点使,后来又改变主意:“先储起二千蚊,再用二千蚊晚饭,二千蚊买书睇增进知识,用二千蚊买份礼物老婆开心,二千蚊买口罩同搓手液,当然仲要买定粮油,分分钟又预备喺屋企被隔离,以备不时之需。”

陈展鹏 “应该会捐一部份,其他未决定,因为啲钱未到手,到咗再算!”

江美仪 “会将部份捐出嚟,帮衬明哥买饭票帮助社会低下阶层,因为帮到人就好啦。”

黄泽锋 “阿囡听日一岁生日,虽然我哋唔主张买礼物,但系生日蛋糕一定要有,所以有咗呢笔钱就会买靓啲嘅蛋糕,另外我自己会换过部新款手机,因为老婆𠮶部真系影得阿囡好靓,我成日都输畀佢㗎!”

李司棋 “我将一万蚊捐咗畀一个朋友,佢先生生病,日日以泪洗面,冇办法啦!其实帮咗人个心系舒服,系好开心嘅,助人为快乐之本嘛!”

黄智贤 “买啲Coupon畀三个女游水啦!海滩又惊污糟,去啲有暖水游池嘅地方啦!又可以买盒靓靓嘅水彩畀我老婆啦!等佢开心啲去画画啦!家啲油彩好贵吓,政府帮补咗好多,多谢晒呀!”

问到家燕姐、黄翠如、陈展鹏、黎耀祥、森美、黄智贤、江美仪、李司棋及黄泽锋点用呢笔“政府回水”?好多人都话会预少少捐出去,真系好人一生平安。