*

upload_article_image

抱囡囡瞓觉最冧 罗子溢望做男友型好爸爸

子溢自爆收工只想返屋企做住家男

罗子溢(前名罗仲谦)最近在新剧《木棘証人》演懒懒散散CID“高力基”,拍住韦家雄演的証人齐齐搞笑,虽然戏中有两大“女神”张曦文同张秀文为他争风呷醋,但现实他眼中只有太太杨茜尧(前名杨怡)和囡囡小珍珠(罗翊心),他大赞抱住小珍珠瞓感觉超冧,更想成为一个似男友一样的爸爸,还自爆因囡囡变得感性又踏实,收工只想返屋企做住家男。

子溢自言属于康乐小组,负责扮人肉机动游戏𠱁囡囡笑,“扮跳楼机咁急坠,扮火车呀,扮喺草原骑马咁,总之人形嘅游乐场。”

子溢(音:日)跟太太齐改名,他只为将个家庭凝聚力加强,“想长辈开心,仔女健健康康,大家都顺利就好。”

讲到跟张曦文同张秀文合作,子溢竟然有眼不识泰山,不知她们是“女神”级,更笑言:“唔怪之得朋友成日问佢哋有几高呀?靓唔靓嘅?仲紧张过我拍咁。”问到做人夫及人父后,是否不再𥄫女,他即老实话:“都睇,讲到我咁圣人都冇人信啦!睇还睇,睇完就算啦!”但笑指剧情需要跟女神们都有咀戏。

子溢厌小珍珠偏瘦,仲搞笑话,“叫珍珠咁细粒,佢偏瘦,早知叫大树菠萝,哈哈!”

子溢在凑小珍珠训练下,令他急速成长,整个人都变得踏实,“有耐性咗,忽然之间老练咗,睇嘢化咗好多嘢咁。”现在收工只想返屋企的他,讲到凑女滔滔不绝,最享受𠱁囡囡瞓,“觉得佢好嗲,有个女性喺你身边好依靠住你,好需要你保护。又好享受同佢say goodnight锡吓佢面珠墩,佢半梦半醒嘅时候,冇安全感就会捉住你只手系咁搓,佢闻到你气味就会瞓得好冧。”他更想做男朋友型的爸爸,“男朋友都可以指导、分享同帮佢,又可以同佢倾心事。”

对于网民想推子溢攞视帝跟尧尧凑成一对,他开心说:“我觉得几好会成为一时佳话,咁我喺度呼吁,希望大家帮帮手。”

子溢现在凑女好熟手,但最爱都是𠱁囡囡瞓。

子溢赞韦家雄演强迫症患者恰到好处,两人度桥搞笑好合拍。

剧中子溢跟“女神”张曦文谈情,他笑言身边朋友比他更紧张。

子溢讲到凑囡囡小珍珠,相当兴奋滔滔不绝。

不过,子溢讲明不想做怪兽家长,会让囡囡自由选择未来生活方式,就算想加入娱乐圈都冇问题,“咪试囉!我提供咗资源,你过你嘅人生,会点样就睇你嘅造化,但我会准备定个plan B,就系爸爸会喺后面保护住佢,但唔可以畀小朋友知道我可以唔使做,靠屋企就得啦!我唔想小朋友太温室长大,我想囡囡硬净啲。”至于追多个小朋友,他只会随缘,但又想囡囡将来有弟妹支持,“我哋总有一日先过佢走,将来有咩事同丈夫分担之外,有个细佬细妹有血缘关系比较好啲。”