*

upload_article_image

江嘉敏同冯盈盈成过气闺密 转黐高海宁做妹仔

发展一段“长短脚友谊”

自从“富豪船P”罗生门事件后,江嘉敏和冯盈盈便由“打卡之友”降呢“过气闺密”,两人更开始各自另觅“饭脚”,如本周日盈盈就约麦明诗擦蟹,而江嘉敏早于8月中已转黐“楷女郎”郭嘉文及富家女邝洁楹。除了埋有钱人堆,近日她又跟一线姐仔高海宁(高Ling)忽然老友,早前《头条日报》就见到两人去又一城食Tea,边食边交换化妆心得又孖住去买化妆品,不过呢段关系明显有“阶级”之分,平日大大声好多嘢讲的江嘉敏,面对高Ling即变得“鹌鹑”,全程企喺不出2米范围内Standby陪逛、畀意见,唔知以为系助手!

化妆技术高超的江嘉敏边食边向高Ling分享画眼妆心得。

虽然合作过无线剧《杀手》及《七公主》,但完全唔觉江嘉敏和高海宁私下有交流,就算喺IG揾张二人合照都难,估唔到近日两人却发展出“长短脚友谊”,日前仲一齐去又一城撑枱脚。

江嘉敏

高Ling

当日下午3时许,虽然只系落街食个下午茶,但贪靓的高Ling都戴晒帽、衬晒一Set韩风西装Look,星味浓到途人都忍唔住𥄫两吓!反观身高165cm的江嘉敏,着住件橙红色连身短裤衬白波鞋,同隔离屋妹仔冇太大分别;可能自知比较矮,为帮自己驳高啲,江嘉敏都刻意扎番个“道姑头”,同172cm的高Ling拉近啲啲距离。其间,两人在餐厅内哄到劲埋研究眼妆,记者Zoom近啲睇,发现素颜的江嘉敏眉短短、面肿肿,同镜头前甜美可人完全两个样,“易容术”咁高超,难怪高Ling都要请教她!

贵为一姐的高Ling好忙碌,步出餐厅时仍讲紧电话,江嘉敏唯有东张西望。

高Ling到LOG-ON买浴盐、开架面膜,江嘉敏全程企定喺隔离畀意见。

江嘉敏好开心咁拎咗个粉红色电风扇畀高Ling睇,点知对方话唔靓,So sad。

继续系陪高Ling逛化妆品牌专门店,其间江嘉敏仲帮手闻粉底。

江嘉敏送高Ling搭Lift落停车场攞车后,她便独自会合男友离开。

江嘉敏与高Ling近日先后合拍无线剧《杀手》及《七公主》。

冯盈盈本周日约麦明诗擦大闸蟹。

江嘉敏传靠林凯恩搭路认识“楷女郎”郭嘉文,令外间觉得她拜金。

今年5月,冯盈盈与江嘉敏被爆上赌王四房公子何猷亨的亿元豪华游艇,事后被指想“钓金龟”的盈盈声称是江嘉敏介绍猷亨给她认识,惟不甘食死猫的江嘉敏暗寸有人讲大话,姊妹反目!

虽然好快两人便于公开活动揽头揽颈,更表示大家谂多咗,稍后会补食生日饭,但时隔4个多月仍未见二人的饭局照。

江嘉敏与冯盈盈降呢“过气闺密”,近日仲转黐一线姐仔高Ling, 两人便到又一城食Tea。

食饱后,两人戴番口罩便到楼下LOG-ON买嘢,高Ling主力睇日牌面膜、眼线笔、染发剂等,江嘉敏就一路长伴左右陪Shopping,最终高Ling拎咗几包浴盐去埋单。在排队畀钱时,江嘉敏睇中一个粉红色的迷你座枱电风扇,正当她兴高采烈打算Show畀高Ling睇时,一向行成熟性感路线的高Ling却唔多识欣赏,口噏噏直指唔靓,被泼冷水的江嘉敏即由“腰果眼”变“阿愁”,转身将风扇摆番原位。随后两人转往化妆品牌专门店,高Ling将唇膏、粉底逐样拎上手研究,不过玩完一轮冇帮衬,最后全程好好“服侍”的江嘉敏陪对方等Lift,之后再独自会合男友坐车离开。