*

upload_article_image

袁伟豪入行廿年做乐坛新丁 未婚妻张宝儿填词讲心唔讲

夫妻档闯乐坛

袁伟豪(Ben)最近继宣布一年前已向张宝儿求婚成功后,再度宣布“有喜”,跟张宝儿(Bowie)心血结晶已经面世,所讲的是Ben入行逾20年做乐坛新丁,首次推出亲自作曲的新歌《你与你的另一半》,未婚妻Bowie更帮手填词,Ben讲明完全没有给钱,还话自己“成条命都畀咗佢”,两人讲心不讲金。其实Ben一直有个歌手梦,只是多年来苦无机会实现,所以会好好珍惜今次机会,还话会朝创作歌手路发展,不排除同Bowie继续合作,笑指对方已成为他的御用写手。

袁伟豪入行廿年,终于有机会做乐坛新丁,还找来未婚妻张宝儿帮手填词,讲明没有给钱。

Ben同《头条新闻》讲,自小受父母薰陶好钟意听歌,对Classic Rock特别偏好,16岁初入行时更加有唱歌机会,可惜当时唱得劲差,又完全不知规矩搞出笑料,“我入行时签嘅经理人公司力图,都有唱片部,当时只有16岁,佢哋都有带我去录音室试音,𠮶次试音非常之难忘,简直系笑死人,唱歌又唔得走音,试苏永康嘅歌,跟住唱到一半仲揭歌词,有啲纸声,个音响师话你唔可以郁啲纸㗎㖞!我即刻讲对唔住。”

由于好多因素影响,Ben花了近两年时间才顺利完成新歌《你与你的另一半》。

Ben之后虽然做歌手无缘,但对音乐热诚一直冇减,除了一直有学结他,01年曾跟柯有伦、陈国坤等合组乐队“Poet”。07年参加香港先生时更带埋结他去面试,不过夺得冠军加入TVB后,Ben已甚少机会再接触音乐,“平时唱歌机会靠登台唱Cover,音乐好似完全放弃咗,结他都冇弹。”突然两年前Ben遇到现在的唱片公司老板,令他再挞着音乐瘾,“我唔想嘥咗呢次机会,唔想后悔,变咗喺好多层面上参与度好多,都揾我自己班底参与。希望大家高抬贵手,畀个机会睇吓我嘅作品,多多畀啲意见指教吓,睇吓有冇咩改善空间。”

Ben坦承一直有个歌手梦,只是苦无机会实现梦想。

得悉有机会圆歌手梦,Ben即时自资去买音乐器材同结他,将屋企窗台化身录音室,先找回04、05年写落的Demo,之后废寝忘餐近10日加埋新创作。这段日子Bowie一直在他身边,成为今次出任填词人的契机,“𠮶段时间佢睇住我做呢首音乐,到一做完出嚟,佢话‘我冇嘢做你畀我写吓’我话‘你咪写囉!’佢一写完我一睇,犀利㖞!都有料到㖞!”歌词亦得到跟Ben联合监制新歌的Terry Chan认可。Ben趁机大赞未婚妻文笔好,“你睇佢IG就知㗎啦!佢文笔好好,因为我之前本相集,啲字都系佢写,我表达我想写啲乜,佢帮我执笔。”

Ben除了制作歌曲,连拍MV都亲自揾班底。

以创作歌手做目标的Ben,未来会尝试不同音乐风格,除了跟原有班底合作外,亦想跟其他音乐人交流。问到会否继续同Bowie合作,他就风骚说:“唔知㗎!如果我第日再有作品出到嚟,佢又写到我又啱嘅,咁咪畀佢试吓囉!(御用填词人?)系囉!都可以咁讲,好似唔使钱咁样请佢,系冇畀钱请佢嘅,我𠵱家系成条命畀咗佢,呢个价值唔系用钱去衡量。(佢填词时你求婚未?)未嘅,如果系可能唔止呢段歌词,或者呢首歌系我求完婚之后作都唔会系咁。”

不想令自己后悔的Ben,今次制作参与度极高,跟Terry Chan出任联合监制。

Ben希望明年疫情过去,能够顺利跟Bowie举行婚礼。

去年Ben在加拿大旅行时向Bowie求婚成功,但一周年时才正式公布喜讯,更用上新歌做片段背景音乐。

Bowie除了样靓身材好,Ben还她大赞文笔好好。

18年,Ben推出个人影集《Benontheroad》,内里文字也是由Bowie执笔。

5月,Bowie为Ben庆祝39岁生日送上结他蛋糕,原来是预告他做歌手。

谈到向Bowie求婚,他坦言两人拍拖3年感觉太自由自在,反而担心会被飞,“我觉得再系咁自由自在,你就会好自在,到时人哋飞你,你唔好喊,我觉得都系时候要谂吓对方,系时候要谂吓对方嘅家人点睇,就心血来潮,谂到喺呢个时候结婚。”至于收埋求婚消息一年才公布,他就解释,“咁开心嘅嘢,恨不得影完𠮶段片,story话畀全世界人知,但我哋都觉得过去一年唔系一个好适合嘅时候分享自己嘅嘢,我哋去post私人嘢都要好慎重去考虑,尽量跟番个潮流,唔想我哋嘅嘢畀人睇到唔开心,要揾个啱timing。”