*

upload_article_image

留港过圣诞都有欧游Feel 盘点各区特色布置

圣诞打卡必到!

圣诞节临近,一家人准备迎接圣诞节长假期,无得去旅行嘅情况下唯有留港消费。本地唔少大型商场都有圣诞活动,有唔少圣诞布置畀香港人打卡影相,止一止旅行瘾之余,唔少地方嘅圣诞布置都设计得非常靓,部分仲令人有如置身欧洲过圣诞节!

The LOHAS康城8米巨型圣诞树布置。

1.一家大细打卡之选: The LOHAS 九米高圣诞树 

位于日出康城嘅The LOHAS,圣诞前夕就布置咗9米高嘅巨型圣诞树,而且仲有一个充满圣诞气氛嘅小庭院。庭院入面,有圣诞老人办公室,可以畀小朋友透过玻璃窗,睇下圣诞老人系点准备礼物同回复小朋友信件。如果小朋友问起圣诞老人嘅故事,家长不妨带佢地去康城睇下,就唔需要谂到头都大啦!全港最大间嘅NAMCO已在康城开幕,睇圣诞布置之余,亦不失为一个小朋友游乐嘅好去处。

The LOHAS康城圣诞老人办公室。

2. 情侣打卡一流:青衣城互动光乐装置

青衣城互动光乐装置“听风的森林”。

“听风的森林”灯饰,适合情侣用作打卡点。

如果担心室内人多挤逼,青衣城嘅圣诞布置都值得一去,有本地初创企业设计嘅互动光乐装置,名为“听风的森林”。“听风的森林”由110组风动光乐装置组成,每组装置都有唔同嘅声效同灯光,每当有风吹过都会发出风铃声,感觉就好似置身于挂满风铃嘅森林入面,而且仲有光效,啱晒情侣打卡!

3. 彷如身处冰岛小镇:1881活化古蹟变欧陆古国

1881圣诞布置,气氛如同异国小镇。

1881广场位置设有8米高大型圣诞树。

除咗康城同青衣城,位于尖沙咀广东道嘅1881前身系水警总部旧址,经过翻新同增添圣诞布置之后,广场位置有8米高嘅圣诞树同5米高巨型北极熊公仔,配合圣诞灯饰,令到整个广场好似异国小镇一样。而且旧水警总部嘅建筑物,本身都系以英式设计建造,配合圣诞气氛,非常有冬天欧游嘅感觉,畀人止一止旅行瘾之余仲可以影相打卡,非常适合一家大细同情侣。

4. AR创造自己的圣诞小镇:中环ifc商场

中环ifc商场中庭位置可配合AR程式,让访客创造自己的虚拟圣诞小镇。

在商场的活动网页内,可用AR程式设计小镇。

圣诞布置固然非常吸引,如果再结合AR扩增实境技术,就可以令到简单嘅布置变得生动。中环ifc商场就为圣诞节推出特别活动,访客可以用AR技术创造自己嘅圣诞小镇,透过手机将ifc变成自己设计嘅模样,仲可以录成短片转发畀朋友。咁就唔怕同其他人撞背景,完全独享属于自己嘅圣诞布置啦!

5. 浓郁欧洲小镇大街气氛:置地广场圣诞市集

中环置地广场圣诞市集,布置成传统欧洲小镇大街。

置地广场中庭三楼内,以圣诞树及旧式街灯为圣诞装饰。

如果冬天去欧洲旅行,街道上总会有一丝肉桂香味,配上欧陆式传统建筑同埋圣诞气氛,简直好似亲临电影世界一样。中环置地广场就将室内变成圣诞市集,将商场布置成欧洲小镇大街一样,一排排圣诞树以及旧式街灯,统统都充满传统欧洲味道,唔讲仲以为将一条欧洲街道搬入商场,不失为圣诞好去处!