*

upload_article_image

蒋祖曼自认无入厨天份 拍节目揾老公帮拖

老公唔帮手一定出事

蒋祖曼(Joman)跟导演老公陈卓麒,日前首次以夫妻档为香港开电视节目《30分钟大放𩠌》出任嘉宾,即场大显厨艺。Joman 向《头条新闻》自爆本身对入厨完全冇天份,平日三餐全靠老公及家佣姐姐搞掂,所以今次节目一定要揾老公帮拖,否则一定出事。讲到首次夫妻档演出,两人都话几好玩,唔排除再合作。

最初Joman都有帮手切菜。

但阿麒睇见唔多满意攞番嚟切。

最初节目邀请Joman时,已即时想到要揾老公帮手,“我经理人知我唔系好煮到嘢,不如叫埋老公帮手,我问佢(老公)冇应我嘅,我话‘你唔去,我死梗㗎㖞!’跟住佢话唔系唔嚟,谂吓先啫!”阿麒解释,“因为我未做过烹饪节目,平时都喺自己厨房自high玩,怕啲观众见到话唔系咁煮㗎㖞!(Joman:哈哈!佢谂得太多嘢。)”

后尾Joman索性专心同主持霍嘉恩倾偈。

阿麒好心急试食“面豉豆卜鸡柳炒四季豆”。

Joman坦言:“我系钟意食,但系唔系咁钟意煮,煮饭嘅过程我唔系好享受,整甜品我都系为咗食㗎咋!我系连面豉同豆豉都分唔到嘅程度,头先仲问点解用碌柚整猪扒,其实𠮶啲冰糖嚟,所以我今日系抱住一个猎奇心态。”最终阿麒煮了“麻辣猪肉干炒饭”、“蒜片牛柳粒意粉”、“面豉豆卜鸡柳炒四季豆”及“糖醋猪扒”。

呢碟“蒜片牛柳粒意粉”,真系几吸引㖞!

Joman与老公阿麒首度夫妻档拍摄《30分钟大放𩠌》。

阿麒解释最初都是焗住学煮𩠌,“我喺澳洲读书,挂住香港啲𩠌咪唯有自己煮,𠮶时同屋大镬饭咁煮下煮下又几受欢迎,跟住到出埠自己住,咪喺间房整个小厨房,煮得多迷熟能生巧。”在疫情下,阿麒更加多下厨机会,Joman仲爆一对仔女就最开心,“平时佢要开工,个仔唔钟意我同姐姐(家佣)煮啲𩠌,所以佢放假最开心,可可(细女)仲会点𩠌,佢系啲大叔口味,钟意食咸蛋蒸肉饼同腊肠𠮶啲。”

Joman跟阿麒14年结婚以来,都是老公下厨为主。

讲到夫妻档演出,Joman话其实两人未拍拖时已合作过,“𠮶时我得17岁,我哋一齐做fitting model认识嘅,之后佢做幕后就试过一齐拍电影《围城》,但系幕前今次真系第一次,今次都几开心嘅,有机会唔介意再合作㗎!”