*

upload_article_image

盛劲人气旺 陆焕恒够大只 麦大力想做“袁伟豪2.0” TVB三小生承诺唔乱搞绯闻

三人都好期待有摄位机会。

因为疫情,麦大力、盛劲为及陆焕恒去年离开航空业转投娱乐圈,34岁的混血儿麦大力拥有灿烂笑容最有观众缘;麦明诗绯闻男友盛劲为人气最旺;陆焕恒大大只亦好吸引!TVB正闹小生荒,三人都好期待有摄位机会,所以向公司承诺会建立正气形象,检点私生活,唔会乱搞男女关系。

陆焕恒、麦大力、盛劲为今年难得留港过新年,希望喺新一年可一炮而红。

大力好钟意袁伟豪喺《使徒行者3》嘅演出,大赞阿Ben好靓仔。

TVB《冲上云霄大选》得主麦大力、盛劲为及陆焕恒好老友,冠军麦大力率先获派明珠台工作,同索女陈约临做主持,但盛劲为及陆焕恒冇妒忌,不时教大力广东话,𠵱家大力进步神速,勉强应付到。

麦大力未带过女仔见婆婆,他否认因为眼角太高。

麦大力率先获派明珠台工作,同索女陈约临齐做主持。

大力钟意亚洲女仔

做飞机师十年,今年麦大力终于有机会留港陪家人过年,好受女仔欢迎嘅大力自爆从未带过女仔见婆婆:“因为要先过阿妈𠮶关,不过,见过妈咪嘅女仔,一只手都数得晒,而我钟意亚洲女仔。”盛劲为形容2020年好得意,有机会转到行:“希望快啲做到合格演员,趁住TVB小生荒,最好同到喺《冲上云霄大选》中有接触嘅冯盈盈一齐演出,咁样会舒服同开心啲。”陆焕恒指目前生活模式同以前好唔同:“我对呢行好陌生,经过多月训练先开始习惯面对镜头。”大力最想成为袁伟豪2.0:“佢好型又靓仔,而且好真性情,好恨同佢合作,(但Ben畀网民批评系“丑男”㖞!)台庆𠮶晚我等咗好耐同佢影相,我觉得OK㖞,我真系钟意佢㗎!”

麦大力、盛劲为都好钟意情格活泼嘅冯盈盈。

大力都想同龚嘉欣合作。

成为公众人物后,三位型男都唔敢乱搞绯闻影响形象,陆焕恒说:“我哋好乖仔嘅,而且我有女友。”盛劲为笑说:“我都想多女,但真系冇乜,因为冇时间出街,不过,𠵱家讲嘢都会小心啲。”大力认真地回答:“我哋好正经,以前做机师时有道门隔住,唔会有女仔容易埋到身!”

盛劲为同胞姐合照,基因非常唔错。

陆焕恒有个稳定女友,情人节更喺社交网放闪。

麦大力、盛劲为及陆焕恒想做成功演员,大力希望将来成为袁伟豪2.0。