*

upload_article_image

陪新抱买BB嘢 家燕姐无上限任买:反正可以重用

家燕姐话新抱钟意买乜就买乜!

下月荣升“家燕嫲嫲”嘅薛家燕心情愈嚟愈兴奋,每天倒数迎接大日子,日日笑唔停。日前趁住复活节,难得儿子石耀庭(Jackson)及大女石祐珊都有假期,腹大便便嘅新抱仔陈素怡(Zoe)都破例出动,举家去咗铜锣湾shopping添置BB嘢,开心到爆嘅“家燕嫲嫲”讲到出口想儿孙满堂:“我无上限系咁畀钱,贵啲都冇所谓,可以重用嘛!”

家燕姐71岁生日好惊喜,最难得有空档,可以去做吓一年一次嘅body check及睇埋眼科医生。

最后一集嘅《流行经典50年》适逢喺家燕姐71岁生日当天录影,曾志伟同一众艺人为家燕姐切蛋糕庆生,现场相当热闹。

曾志伟话家燕姐事业线深长,承诺《流行经典》年尾会再回归。

多年嚟薛家燕日日忙到癫,咁啱TVB综艺节目大改革,可以放低做咗4年的《流行经典50年》重担,真真正正享受吓人生,她开心说:“日前新抱仔带我去铜锣湾食Tea,我就陪佢睇BB嘢。我哋好似去咗泰国渡假咁,好享受!第一次同新抱仔行街,见佢个肚咁大,样样都睇住佢,不时叫佢坐吓休息吓,但佢步履轻松,反而会拖到我实,照顾返我。shopping期间,有唔少途人上前恭喜我,今年生日真系有好多惊喜。”

家燕姐同儿子全程睇实Zoe,但Zoe佗得个样好靓,行动好轻松,反而照顾返奶奶。

两母子研究BB车,以安全及质料为重。

当日,家燕姐同Jackson主力睇BB睡牀、Car seat、奶樽及消毒器等,家燕姐仲忍唔住嫲嫲上身,出手抱起个身穿蓝白色间条A字裙嘅BB公仔,好有爱!问到系咪有喻意时?家燕解画话:“其实男孙定女孙都冇所谓,我一样咁欢喜。”

家燕姐睇婴儿牀时抱住BB公仔,一脸满足。

问到家燕姐,有冇送上名贵大礼畀新抱仔鼓励佢生多啲?她大笑说:“唔需要,佢乜都有,而且Zoe好精打细算,佢反而会从安全、稳阵、有质量嘅BB用品入手,总之佢钟意买乜就买乜,我不设上限,反正可以重用,变相贵买平用。”疫情下家燕姐年几冇见喺内地营商嘅男友A君:“今年生日佢有送花,礼物就坚持要面交,呢方面咁我都明嘅。其实佢好想下月返嚟见吓BB,但佢做生意咁忙,要隔离比较麻烦。”

珊珊及后加入茶聚,一家人好似去咗旅行咁Enjoy。