*

《陈滢嘅仙气,胜过柠檬夹心饼嘅香气。》

  话说上星期六啊强突然打比我,话朋友搞咗个Party,已经预埋我去。       “吓?咩Party嚟架?”我问。   “咪又系包个会所,请一堆人去玩咁囉。”   “依啲FD搭FD搭FD结果去到分几廿个小圈子劈酒嘅Party我最憎㖞。”   “我知,但系有陈滢㖞。”   “陈滢?”   “系啊,好似系我朋友个表妹个同事个朋友嚟,总之有佢啦。”   “时间地点,我准时到。”话哂陈滢系我女神,净系可以同佢Say个Hi影张相我都心足,几大都去。       到咗㖊晚,我专登去恤个靓发,执正自己飞的去目的地。陈滢未到,但在场已经有唔小雄性每隔几秒就望一望门口,好明显大家嘅目标都系同我一样。等咗半个钟,红酒都饮咗几杯,我去咗个厕所放一放水,点知一出返嚟就见到班雄性围埋一堆——原来我啱啱行入厕所陈滢就出现,个天硬系咁钟意玩我。望住蚊都插唔入嘅人墙,我行出露台食住支加热烟,对同陈滢合照依件事打定输数。       就喺依个时候有人推开露台嘅门,我抬头一望,居然就系陈滢本人。佢望住我喷紧出嚟嘅烟下意识掩住口鼻,而我就行过去拎支加热烟比佢睇。       “依只烟冇烟臭味架,放心。”   “又⋯⋯好似系㖞,仲甜甜地嘅?”佢微微缩手闻一闻,发现真系冇味之后终于放低双手露出佢招牌甜到漏嘅笑容。   “你觉得佢似咩味?”   “好似系⋯⋯柠檬夹心饼?”   “利害㖞,一估就中。”   “真架?”佢又对住我笑,个笑容真系甜到我觉得支烟都开始冇味。   “头先我见好多人围住你架,咁快签哂名影哂相啦?”   “冇啊,我冲出嚟架,突然比咁多人围住真系吓亲。”佢讲完自己都笑一笑。几时可以研发到只陈滢笑容口味嘅烟?甜到咁我一定一日清一包。   “正常吖,我谂十个男人有十个都系为你而嚟。”   “咁你咪都系囉?”望住陈滢依个表情,直到有种“好贱啊你”嘅感觉。       我都未开口答佢,又有人推开度门行出露台。有个女人行过嚟同陈滢讲咗几句,然后一望到我手上面支加热烟就突然拧转面同我讲“咦,我都系食依只㖞,乜咁啱嘅?”       关我鬼事咩,阻住我同女神倾计。       “哦,乜系啊?”我感觉到我语气一下子冷淡咗好多。   “你呢只系柠檬爆珠?我上次去韩国都有买⋯⋯”        我冇留心听佢讲咩,只系见到陈滢行开嘅同时用口形讲低佢去厕所——不过系同个女嘅讲。睇嚟佢地都几熟,系咁嘅话我如果同依个女人打好关系的话⋯⋯       “喂啊,你有冇听我讲嘢架?”果然系港女格,把声都难顶过人。   “有啊,不过韩国弹唔系好岩食,都系万记浅绿正啲。”为咗识陈滢,我忍。   “系囉!我都觉万记浅绿啱我口味啲。”   “哈哈。”我干笑咗两声。   “嚟紧我同朋友有个聚会,好多人都有食加热烟架,佢地识改灯洗笔,有冇兴趣?”   “好吖,电联。”       我同佢交换电话,为嘅当然唔系加热烟交流会,而系为未来可以再见陈滢做好准备。我借尿遁行出去希望可以揾到陈滢继续之前嘅话题,但见到佢嘅事候佢已经拉开大门离开会所——睇嚟佢对依类型Party都冇咩兴趣。我急步追出去,就喺啱啱行出会所,已经见佢上准备的士。       “我仲未同你影相啊。”我望住的士大叫。   “下次吖,如果下次再见到你,我同你影张相。”佢𠮶个无敌嘅笑容依旧冇变。   “一言为定?”   “一言为定。”讲完佢就上咗车。       我转身入返会所,行出露台揾陈滢个朋友继续加热烟嘅话题。为咗陈滢,为咗同佢嘅合照,我一定会再揾机会见佢一面,依露台嘅依个女人,就系我可唔可以成功嘅关键。       想知之后系点?迟下再话你听。   FACEBOOK:https://www.facebook.com/MOYINDAY TUMBLR:https://moyinday.tumblr.com/ Fanpiece:https://women.fanpiece.com/moyinday/ Medium:https://medium.com/@moyinday

毛言地

** 博客文章文责自负,不代表本公司立场 **