*

《曾经你嫌弃平凡嘅爱情,但而家先明佢有几难能可贵》

  同自己钟意嘅人一齐,放工一齐食个饭,有时可能睇多场戏;放假就行下商场,再唔系入迪士尼转返个圈。曾几何时,你觉得咁样嘅爱情生活好闷,拍拖拍到例行公事咁样:接佢出去行街食饭睇戏再送佢返屋企,依种并唔系你想像中甜蜜幸福嘅生活。       直到有一日你发现,原来平凡系咁难能可贵。   可能你连续一个星期OT,夜晚九点几仲喺公司搏杀;又或者你食紧个谭仔,但仲要忙住覆客人Email同老板WhatsApp。突然间你心血来潮,揾返上年同前度食饭𠮶阵嘅一张合照,虽然食嘅唔系咩贵嘢,环境唔好系靓,但可以舒舒服服咁同佢食一个二人晚餐,你心入面突然有一种怀念嘅感觉。虽然你地拍拖嘅节目系闷啲小啲,但可以同自己钟意嘅人自由自在咁过一日,喺唔需要担心任何嘢之下渡过二人时光,其实都系另一种幸福。       爱情唔需要太花巧,唔需要每分每秒都制造到惊喜比对方——当然依个系提升情趣嘅一种方法,但耐唔耐有一次已经好够。通常维系得耐嘅关系都系平凡不过,就好似喺街到见到一对老夫妇拖住手慢慢行,毫无惊喜,但甜蜜满分。比起惊喜带嚟嘅刺激,日常生活微细嘅关心同动作更加比到对方安全感:例如佢随手拎起件衫就知你啱唔啱著,而你一揾就揾得出佢采开𠮶只唇膏嘅颜色。依啲嘢唔值得放上IG同FB放闪,但要保持一段关系就一定唔可以少。       如果你喺平凡当中揾到值得你珍惜嘅嘢,依一刻嘅你又对爱情了解多咗啲。可惜嘅系你曾经拥有住依个幸福但唔识珍惜,而家失去咗先明白依个道理,然后后悔莫及。星爷嘅对白,真系几时都啱用。     FACEBOOK:https://www.facebook.com/MOYINDAY TUMBLR:https://moyinday.tumblr.com/ Fanpiece:https://women.fanpiece.com/moyinday/ Medium:https://medium.com/@moyinday

毛言地

** 博客文章文责自负,不代表本公司立场 **