1月20日,大致天晴,早晚清涼。隔晚美股先升後回軟,三大指數以全日低位收市,道指跌339點;標指跟納指分別跌444及166點;納指現價已較去年11月高位回落超過一成,陷入技術性調整。以小型股為主的羅素2000指數收報2062點,跌33點或1.6%,創52周收市新低。


聯儲局將於下星期議息,由於該局官員一再強調以鷹派立場應對通脹問題,有消息指最快3月開始加息,甚至今次議息後就宣布加息。美債息升至1.9厘水平,為2019年12月以嚟最高。由於美債收益率飆漲,吸引更多資金流入債市,增長股近期顯著受壓。當中,疫情概念股更見愁雲慘霧。加息預期以及金融條件收緊,損害了投資者對聯儲局長達10年寬鬆貨幣政策的信心,資產估值料將持續受到壓縮。雖然加息預期令市場波動較以往高,但聯儲局已多次向市場釋放加息信號,因此反應唔會好似過往咁大。


至於港股仍然喺24000水平整固,隔晚夜期無啦啦挾返上去24200水平,暫時無乜方向,資金仍然係喺板塊之間輪動,近日以傳統股表現較佳。古天后仍然睇好政策傾斜嘅股份,而綠色能源股預計今年仍可跑贏大市。至於傳統股方面,基建股仍然係焦點所在,當中除O左水泥股有資金追捧外,重型機械股亦具留意價值。


隨住農曆年長期逼近,預期港股又開始進入悶局,下周期指結算過後,大市估計亦唔會有顯著方向,呢段時間少做少錯,可能要畀O的耐性,留待過年後再出擊,暫時只宜輕倉上陣,短期未係時候進取。


古天后


(徐狄怡,證監會持牌人)