第一場三班一千米。我就揀咗「飛凡」做重心,佢上仗頭段跟好順,而且出閘反應亦好,不過出彎入直路後遇到阻塞,好彩鞍上人應變迅速,好快移出外疊望空,隨後仲愈衝愈順,贏馬姿態非常輕鬆,盡顯大熟大勇。今賽再出抽到黃金一檔,鞍上人繼續配贏馬拍檔波健士,予人信心保證。晨課方面,此駒近期操得好密,擺明有心用盡一時,今場定會繼續拼搏。配腳方面,我揀「智醒財星」同「事事亨通」。
  第三場五班千二米。我就鍾意「神朗金剛」,佢今季四戰全入前四名,次次有獎金收,演出忠心準繩,由於經過連場熱身,狀態亦漸及水準。另外,復課見佢專誠試泥閘再加打磨,令狀態再上層樓,明顯早前上從化休息一輪,對佢帶來莫大幫助,推算近期進度,今場誠是贏馬黃金機會。
B女