博客文章
今晚霸戲哥可以乜都唔睇，除咗凌晨舉行嘅世界盃決賽週分組賽抽籤儀式。至於邊度有得睇，大家咁醒唔使我教喇。
今屆世界盃於年底喺卡塔爾舉行，決賽周32支球隊，依家已經定出29支（又冇意大利），餘下嘅1個歐洲區同2個跨區席位，要等6月先揭曉。（希望烏克蘭快啲停火）
霸戲哥同豬視妹都係英格蘭死忠，梗係希望佢抽到好籤，唔好被編入死亡之組，好似四年前咁輕輕鬆鬆殺入淘汰賽，你都咪話唔爽。英格蘭今年繼續由領隊修夫基領軍，鋒線有隊長哈里簡尼攻堅，中場線就多咗Kevin Phillips同Declan Rice呢對防中孖寶，陣容可以話比四年前更完整。今次仲唔拎到世界盃？
不過講乜都假，陣間抽到好籤最實際。
霸戲哥
** 博客文章文責自負,不代表本公司立場 **
霸戲哥身邊有好多朋友，見我無所事事，一直游說我玩crypto。佢哋灌輸好多抽象嘅概念，甚麼去中心化呀，甚麼對抗現有金融體制呀，總之好有vision。最重要係，佢哋又真係坐定定賺到錢，講到霸戲哥心郁郁。喂，有邊個唔想不勞而穫？
對於crypto概念，霸戲哥係百分之一百相信，亦都覺得係大勢所趨。但去到呢刻，我都解釋唔到點解仲未進場。我硬係覺得有嘢唔妥，但又講唔出係乜。
直至最近睇咗Netflix套紀錄片《別相信任何人：虛擬貨幣懸案》，我諗呢個疑團終於解開。
紀錄片講述轟動一時嘅疑似cryptocurrency欺詐案件，話說有2.5億美元嘅bitcoin喺加拿大最大嘅加密貨幣交易所QuadrigaCX度消失，而QuadrigaCX創辦人Gerald Cotten係唯一可以取回bitcoin嘅鎖匙人，但突然離奇死亡，令一班苦主血本無歸。紀錄片用唔同角度，嘗試搵出真相。究竟Gerald Cotten係「假死」夾帶私逃？定係佢身邊人有警轟？還是其實一切都係陰謀論？呢個就要觀眾自行去判斷。
唯一可以肯定嘅，貪字永遠得個貧，若果閣下存心諗住靠炒crypto一夜致富，霸戲哥都係勸你咪制。
