霸戲哥之日常#170 │ 戲院大開

隨住新冠疫情持續放緩，社交距離限制亦逐步放寛。特首林鄭月娥今日宣佈，由5月19日起，戲院入座率突然由50%增至85%，仲可以飲食添！至於使唔使打齊三針先入得呢，相信院商同一眾電影從業員同霸戲哥一樣，爬咗好耐文都未有一個肯定嘅答案。

戲院突然「中門大開」，好多電影界嘅朋友都嘖嘖稱奇。明明記得上年雖然每日冇新增個案，但戲院仍然嚴守禁止飲食規定，豬視妹想食粒藥，都要偷偷摸摸隔住口罩放入口，連水都唔敢飲滴。依家第五波疫情都未完結，每日新增個案都有幾百宗，一下子放寛飲食，唔通唔怕又嚟大規模爆發？霸戲哥真係諗唔通。

點講都好，對於院商嚟講，開放番飲食都係件好事，畢竟零食先係戲院嘅主要收入來源。至於入座率限制放寛，就意味住嚟緊上映嘅大片，好似《DC超寵聯萌》、《侏羅紀世界：統治霸權》同《壯志凌雲：獨行俠》，就比較容易撲到靚位囉。

霸戲哥

** 博客文章文責自負,不代表本公司立場 **

大家話睇唔明《金宵大廈2》， 好啦，TVB徇眾要求，畀番啲易入口嘅劇集大家送飯。緊接《金宵》嘅係由馬德鐘、湯洛雯同賴慰玲主演嘅《雙生陌生人》，走搞笑路線，輕輕鬆鬆唔使用腦笑完又一day，正。

啱啱播出第一集，例牌交代吓啲角色咁，套劇以「撞樣」為主題，律師高收成（馬德鐘）同地獄黑仔王巫祺男（又係馬德鐘）就係生得一模一樣，連iphone嘅人物識別鎖都分唔到。黑仔版馬德鍾可塑性幾高，霸戲哥終於唔使睇佢扮專業人士。去到最尾一節，湯洛雯女神look出場，連登仔又有話題啦。

馬德鐘以前就一直畀人話係「萬能key」，任何相片都可以key到佢個樣上去。唔知監製係咪睇中呢點而搵佢演呢個角色呢？