獨自離鄉別井難免感到不安，故希望找到志同道合一起結伴同行。一名40多歲的男網民於社交平台發文，徵移民伴侶一起前往英國，強調毋須擔心財力問題，「我可以照顧你」，引起一眾網民熱論。
40歲港男網上發文徵「移民伴侶」。FB圖片
該男名網民於facebook群組「大埔人大埔谷」發文指，自己年逾40歲，目前單身，惟英文能力差，故希望找一個伴侶一同前往英國，「想搵返大埔人一齊走，最好同村長大」，他坦言不想人在外地孤獨終老，「一把年紀人在外地唔想一人終老，希望搵返大埔人相依為命」。
一名40歲港男於網上徵伴侶移民英國。網圖
樓主又指，經濟能力方面「你無我有」，承諾有足夠財力照顧伴侶，「你唔做嘢夠生活嗰種」，並透露打算在香港考取車牌後便出發，「時間上希望就到我」，呼籲有意者可私訊聯絡。
資料圖片
帖文引起熱烈討論，不少網民笑言以為是徵婚告示，「以為自己睇緊50年前嘅登報尋偶」、「簡單啲即係佢搵人陪佢去英國過人世」；有網民則發現樓主的帖文內有多個錯字，「咁多錯字我接受唔到」、「睇嚟佢唔單止英文，中文都唔多掂」。
資料來源：大埔人大埔谷
資料圖片
食客叫連鎖快餐店外賣驚見「超薄切豬扒」、「紙咁薄西多」，引網民嘲諷「燈影豬扒」、「西多紙」。
食客買外賣驚見「超薄切吉列豬扒」
有食客於Facebook群組「香港茶餐廳及美食關注組」發文，表示日前到某連鎖快餐店買外賣，當打開外賣後盒，驚見其中的吉列豬扒超級薄，更揶揄「薄切吉列豬扒，真係好功夫」。從照片中可見，這塊吉列豬扒真的非常薄身，外層的炸粉比肉更厚，十分誇張。
有食客光顧連鎖快餐店買外賣，驚見「超薄切吉列豬扒」。（FB圖片）
引網民揶揄「燈影豬扒」
照片一出，不少網民批評快餐店離譜「偷工減料好嚴重」、「加價好過降低食物品質，做臭自己個招牌」、「根本用肉片，佢都好意思俾人食」；網民更紛紛嘲諷「傳說中嘅燈影豬扒」、「豬肉乾厚過佢」、「係吉列火腿」、「炸紙皮箱」、「俾鍾意食脆漿嘅人食」、「要利潤厚啲都要練刀法㗎」、「以後可以話人情豬扒咁薄」、「吉列皮厚過肉！」、「爭少少薄過A4紙」。
有網民留言表示亦曾經中伏。（FB圖片）
又係連鎖快餐店出事，食客堂食「西多紙」
其後，又有另一食客於同一Facebook群組分享類似中伏經歷，表示日前到某連鎖快餐堂食，點了雞髀拼西多士，豈料西多士竟然薄如蟬翼，他立刻拿出身上的拉尺一度，件西多竟不足0.5厘米厚，從照片看，根本看不出來是一件西多，樓主苦笑言「好食，皮薄餡靚，大推」。
有另一食客遇上「西多紙」。（FB圖片）
網民笑「人情薄⋯西多仲薄」
帖文同樣引熱議，有網民搞笑表示「西多紙」、「而家牛角包都興壓扁黎食，可能佢跟潮流啫」、「師兄腐皮嚟㗎喎⋯」、「我以為係餐紙嚟」、「人情薄⋯西多仲薄」、「炸雲吞皮？」、「可能係春卷皮」、「又有納米吉列豬扒又有納米西多，香港真係飲食天堂」、「人情紙咁薄已經過時，而家興用吉豬或者西多」。
網民分享「超薄叉燒」。（FB圖片）
有人分享「超薄紅腸」。（FB圖片）
帖文來源：Facebook群組「香港茶餐廳及美食關注組」
