英國緊跟美國制裁俄羅斯,搞到能源價格飛漲,電費貴到嚇親人,不少移英港人成日都要諗計慳住使。日前就有一個自稱居英多年的港人,發帖分享「終極慳電費大法」,結果引來大批網民湧入留言,鬧爆樓主好cheap。
究竟樓主分享的「慳電費方法」是甚麼?
原來,呢個「終極慳電費大法」就係搵一個免費充電站,等待期間「work from car」,等泊車時限到,就揸車番屋企,用轉駁器供電俾全屋大部分電器。
樓主又建議,如果覺得麻煩,仲有另一個「慳少啲但冇咁麻煩」的方法,就係「用平plan 夜晚充電8p/kwh 日頭再攞番黎到」。
不過呢個被樓主形容為「絕世好橋」的做法,網民似乎唔係好buy,認為「偷電」多過「慳電」,「同去公廁頭廁紙番屋企用係一樣」,「懇請唔好將典型香港叻仔、走精面、諗縮數的行為+意識帶埋去英國」,更有人揶揄「不如落雨出街沖涼啦,仲慳呀,唔啱做埋乞衣啦,最平」。
見到勢頭不對,樓主就辯稱理論探索唔應該有限制,又形容自己只係brainstorm,其後再出post話慳電大法的討論係「學術自由」,批評佢的網民係「葉公好龍」,又辯稱自己只係言語討論,被網民屈「濫用」。
有網民不齒樓主死撐,直指明明就係公開教緊人點樣衰格走精面,竊取公共電力作其他非原供應用途,一時就「諗到條絕世好橋」,一時就話其實個方法上網都搵到有人教,俾網民鬧就話係學術研究、呻言論自由,「其實你真係知自己一路成個過程講緊乜嘢㗎呵?」
高人就話這場「終極慳電風波」背後,可以見到,英國通脹處於高位物價飛漲,能源費用等固定生活開支的確已經成為移英港人沉重的負擔,有不少人在網上訴苦生活艱難。
早前就有移英YouTuber拍片狂呻英國電費食水超深,冬天一個月交了6,600港元電費,「嚇到暈咗」,翻查帳單發現,短短幾個月電費已經漲了70%。
亦有網民在網上投稿話,一對移居英國的香港夫婦疑為咗慳電費,凍到北極咁都唔肯開暖爐,結果成間屋都發晒霉,屋主嬲爆決定唔會再租屋畀香港人。
一些香港人冇做好充分準備,一時衝動就草率決定移民,去到英國先發現同自己憧憬的生活相當不同,不少人搵唔到體面工作,又難以支撐高昂的生活成本,結果就搞到好狼狽。
Ariel
** 博客文章文責自負,不代表本公司立場 **