唔經唔覺，TVB套《食腦喪B》今晚就大結局。輕鬆喜劇真係有佢嘅市場價值，豬視妹每晚八點半幾乎釘實電視，睇埋預告完連汁都撈埋先肯收手。霸戲哥間唔中都會望吓，居然都唔會甩劇情，唯一唔滿意係首主題曲有句「喪B變真漢子～～」不停洗腦。哎，又loop緊啦頂。

講起喪屍有段故，喪屍英文即係Zombie啦，由於霸戲哥細過勁沉迷D&D（超老餅吧），所以小學已經識得呢個字。不過我讀嗰間so-called名校中學，原來好多人唔識。話說有年班際足球，每班都要諗個隊名，我哋嗰隊原本叫「勁射精英隊」，結果成隊人連埋我，未開波前先記一個缺點。為咗參加比賽，有位同學求其喺本英文字典度摷個字出嚟做隊名，Zombie隊正式成立。記憶中，Zombie跛吓跛吓咁殺到入決賽先畀人屠宰。

今晚大結局，講到黎振燁研究喪屍基因，搞到喪屍病毒蔓延，成個港島都被隔離。嚟到大結局，最期待嘅群毆喪屍戲終於要上演啦，「C妹」林凱恩着住緊身衣，腳踏roller手持棒球棍，左一件右一件清脆俐落。

至於「喪B」何廣沛嘅遭遇係點，會唔會變返人，陣間睇咪知囉。




霸戲哥

** 博客文章文責自負,不代表本公司立場 **