豬視妹除咗煲劇叻，煲湯煮飯都有一手，任何餸菜食材擺喺佢面前，就算係蔗渣嘅價錢，一樣煮到燒鵝嘅味道。

不過「天才小廚師」都有佢嘅弱點，就係只限於家常小菜，講到煮啲高難度嘅譬如宮廷菜，始終冇乜機會去學同試。高級食材咁貴，哪有錢？

自己冇得食啫，都可以睇吓人哋點煮嘛。TVB聽晚起逢星期一至五晚8點半，將會播出人氣內地劇《尚食》。《尚食》由《延禧攻略》班底製作，故事以明朝為背景，講吳謹言飾演嘅尚食局宮女，精通烹調中華美食，又復原好多歷代失傳嘅食譜。劇集除咗有美食同傳統文化元素，例牌唔少得梗係有宮廷權鬥啦，估計又會借啲意滲入少少女權主義，打破父權社會嘅刻板框框。

據講劇組花咗超過半年時間搜集資料，劇中涉及嘅菜式涵蓋咗魯、川、粵、京、閩、 浙、蘇、徽等菜系，好適合豬視妹去偷師。若然有鼎爺李家鼎做聲音導航，又或者親手示範埋劇中幾道撚手菜式點整，就梗係冇得輸啦。




霸戲哥

** 博客文章文責自負,不代表本公司立場 **