霸戲哥之日常#197 │ 明日NFT

號稱全港首部史詩式科幻鉅製、又名為「古天樂心血結晶」嘅電影《明日戰記》，今日終於有新消息啦。只可惜唔係公佈上映日期，而係推出呢期玩到爛爛哋嘅NFT項目。

呢套耗資咗4.5億嘅《明日戰記》，如果淨係睇住香港市場嚟食，就梗係回收唔番啦。不過古生咁精明，梗係唔會只顧眼前，呢部戲嘅IP、衍生出嚟嘅周邊商品、以至攻打國際市場嘅票房收益，潛在利潤真係冇辦法預計。套戲一個唔覺意蜚聲國際，到時肯定連本帶利翻幾翻。大前題當然係套戲拍得好睇先啦。

至於《明日戰記》呢次推出嘅NFT，都算係利用電影IP嚟衍生另類收益。據相關網站顯示，呢隻NFT有1萬套，相信係同盔甲有關，而有份演出嘅張繼聰同姜皓文都逐啲逐啲漏口風，似乎大家要到Discord軍事指揮中心報名，完成一系列嘅任務就有機會獲得套盔甲，而呢啲盔甲會唔會就係嗰批NFT呢？真係要繼續follow先知嘞。

由電影玩到web 3.0，再將資金用番去宣傳電影之上，真係唔到你唔服。玩下手，分分鐘改變埋日後嘅電影生態添！

霸戲哥

** 博客文章文責自負,不代表本公司立場 **

霸戲哥初初入行，曾經獲委派一項神聖任務—就係編輯電視節目表啦！大家千祈唔好睇少呢個task，你永遠估唔到最多人啄住嚟睇嘅，唔係港聞，唔係鹹版，更加唔會係財經，而就係你哋啱啱嗤之以鼻嘅電視節目表。

當年工作關係，霸戲哥亦會份外留意各台嘅收視，呢個習慣直到依家都摵唔甩。坊間都有唔少人啄住收視表，或者方便大造文章啦，但主流媒體都係習慣報翡翠台同ViuTV嘅收視，而J2、開電視嘅收視呢，一直都好似謎一樣。

霸戲哥今日忍唔住走去八卦吓，究竟有冇人睇J2同開電視嘅呢，結果原來都幾出人意表。我姑且抽噚日星期日夜晚9點到11點嘅時段去睇，開電視嘅收視係相對「穩定」，但係由2.2一直回落到1.0，其時係播緊舊片《神勇雙妹嘜》。J2都係用同一招，但就播古天樂嘅《保持通話》，收視就由1.4慢慢攀升至4.1。而喺10點打後嘅時段，收視仲高過ViuTV添。即係話，J2係有一定捧場者，相信都係年青人為主，話唔定播舊片（當然要高質素啦）都係唔錯嘅選擇。

J2近排都多咗唔少target年輕人嘅節目，好似《冇人性教育》、《逝者代言人》同埋《趁依家去台灣偷食…譜》咁，都算係幾有噱頭。霸戲哥就想佢有多啲體育節目，如果第日可以有啲體育分析節目就fit嘞。