終於抵受唔住坊間一致嘅好評，特登請假入場睇《奇異女俠玩救宇宙》。呢輪伏戲霸戲哥睇唔少，原先都抱住獵奇心態降低個期望值，睇完先知好評非曲兼冇伏。霸戲哥夠膽講，呢套戲將會成為後世講完又講嘅超級cult片。

導演Dan Kwan同Daniel Scheinert個腦唔知咩構造，說故事方式完全唔跟章法，可以話完全冇路捉，前半段劇情如過山車的大暴走，觀眾只有死跟份兒。你以為成齣戲就以胡鬧方式推到完場，中段就以親情倫理角度入手，慢慢拉觀眾返番去有邏輯嘅時空。到尾段又忽然嚟個哲學學術研討，探討起虛無主義、存在主義⋯⋯結局係最出人意表，導演竟然可以將前面失晒控嘅劇情嚟個無縫銜接，仲要完全解得通，霸戲哥真心大服。

演員方面，楊紫瓊放下明星包袱演大媽冇得輸，演員嘅多樣性本身就好切合多元宇宙嘅命題，呢個Evelyn可以話係為楊紫瓊度身訂造。下屆奧斯卡唔該預留一個影后提名畀佢。聽聞原本係諗住搵成龍拍嘅，只可以話，好在呢個時空係楊紫瓊拍嘅啫（笑)。

寫寫下又想入場睇多次添。




霸戲哥

** 博客文章文責自負,不代表本公司立場 **