*

霸戲哥之日常#206 │ 唔好怕蝕底

老竇教落,做人千祈唔好斤斤計較,所以細個借功課畀同學仔抄,甚至幫佢哋做埋,霸戲哥都冇乜所謂,只係當時對呢番話半信半疑。直至一日,我發現成績突飛猛進,而同學仲開出三蚊一份功課呢個offer時(三蚊夠買汽水),我終於明白呢句話嘅真諦。

唔好斤斤計較,其實係唔好計較眼前得失,因為往後嘅得益肯定更多。換句話講,呢個反而係更精密嘅計算。唔怕蝕抵,樣樣行多步,到頭來得益嘅多數都係自己。

我諗阿Bob林盛斌都一定參透呢番話。佢最近分享咗個小故事,話說有間公司送咗部鹼性水機畀佢,賀佢新居入伙。阿Bob收得人禮,就自動波拍番條片嚟介紹吓產品,仲好耐心咁回覆每個網民嘅留言。今日,佢就做咗呢個牌子嘅水機代言人。

有幸見到呢個post嘅讀者,由今日開始,嘗試唔怕蝕底,多行幾步。有一日,你會發現個世界係真係會唔同咗。

霸戲哥

** 博客文章文責自負,不代表本公司立場 **