呢期最威係巴斯光年，電影《光年正傳》上星期先上畫，Disney+順勢又loop番啲Toy Story舊戲，就連貌似巴斯光年嘅鄧梓峰，都啱啱有新節目推出。
霸戲哥兜咁大個圈，無非都係想講吓J2個新節目《關注關注組》啫。除咗鄧梓峰，仲有幾位靚女陳欣茵、杜穎珊同王虹茵做主持，內容顧名思義，就係關注facebook入面嘅關注組。TVB今鋪攞正牌上網攞料，慳水慳力得嚟又幾有gimmick噃。
呢啲所謂XX關注組，其實只不過係N年前討論區嘅演化版，特點係耐唔耐就會有素人出post，圍爐討論一番。霸戲哥成日覺得呢啲關注組嘅版主都係打手居多，借頭借路出post引人討論為名，宣傳為實，甚至抹黑潛在競爭對手。
霸戲哥噚晚睇嗰集《關注關注組》講「燒賣關注組」，幾位年輕主持真係有落區試唔同燒賣，驗證吓版主嘅評分嘅可靠度。
話時話，霸戲哥都開咗個「香港影視娛樂關注組」，唔知鄧Sir有冇興趣關注吓呢？
霸戲哥
** 博客文章文責自負,不代表本公司立場 **