之前霸戲哥介紹嘅J2節目都係吃喝玩樂，但做人點可以淨係食玩瞓？既然J2擺明車馬主攻後生仔市場，就當然有責任提供番適當嘅養份畀佢哋。
逢星期五晚9點半播出嘅《開卷》，就係年輕人需要嘅養份。節目由Patrick Sir主持，每星期由佢去推介一本好書，相信以佢嘅博學同品味，斷然唔會求其hea吓觀眾，而涉獵嘅題材應該文史哲理甚至奇書都有。
說來慚愧，霸戲哥嘅少年時代都睇唔少知識型節目，好似《成語動畫廊》、《每日一字》、《江山如此多Fun》咁，消磨時間之餘又真係有嘢袋到落袋。唔知《開卷》撻唔撻得着番吸取知識嘅衝動嘞。
霸戲哥
** 博客文章文責自負,不代表本公司立場 **