錢財事
《2022年中國購物者報告》發布，顯示2021年快速消費品發展態勢延續到了2022年初，在疫情帶來的不確定性影響下，消費者變得更加謹慎、對價格更加敏感，動蕩將成為新常態。
研究表明，電商成為2021年唯一保持增長的渠道，增速從前幾年的30%左右下降至15%。電商平台也逐漸分化，其中，以抖音、快手(01024)為代表的直播電商平台和拼多多正贏得越來越多消費者的青睞。
不久前收官的618大促中，品牌商家取得亮眼表現。數據顯示，5月20日至6月19日活動期間，快手平台品牌商家成交總額按年增長515%，美妝、生鮮、數碼家電、二手、花寵文娛等行業均在大促期間打破了2022年日銷記錄。抖音電商參與活動商家數量則按年增長159%，交易額破千萬人幣的品牌達758個。
6月20日，天氣炎熱，部份時間有陽光，間中有幾陣驟雨。隔晚美股休市，歐洲股市見回吐，但跌幅唔算嚴重。美國國務卿訪華，雖然連習大大都見咗面，但中美雙方會面後未見聯合聲明，雙方關係只能算打破僵局，但談不上完全破冰。由於內地經濟表現於開關後，復甦不似預期，經濟面未能支持人民幣強勢，人仔喺上周五反彈後，周一又回復跌勢。
內地國常會結束，未見有任何重大刺激經濟政策出台，618購物節成績未見突出，噚日ATMJ開市未幾即下跌，跌幅全線超過3%，之前一直強勢嘅快手(01024)更跌半成。下半場傳出習大大將會見布林肯，港股由低位反彈，呢啲重磅科網股跌幅亦收窄，帶動港股跌幅削半。
618購物節成績如何，喺各電商未有公布銷售金額下，大家都心中有數，應該唔會好得去邊，否則早已打鑼打鼓，高調宣布銷售數字。相比喺疫情之前，每當有呢類銷售推活動，唔使十個八個鐘，又話打破去年銷售紀錄，近呢三年已再無呢支歌仔唱。
不過大行對電商股都算客氣，指目前內地消費力弱，電商平台銷售產品以平價貨為主，總收入有啲啲增長都已超過預期，表現唔錯，繼續睇好。不過報告睇好還睇好，但身體最誠實，噚日未見資金入場掃電商股，主要係官方無實際銷售數據公布，大行報告都係避重就輕，電商實際整體營收表現如何，市場一清二楚，當然唔會賣賬，尤其電商如京東(09618)大灑金錢補貼進行推廣，即使谷得起個銷售額，但薄利都未能多銷，拖累整體盈利表現，電商補貼戰難以持久，相關股份經過一輪反彈後，市場面對618購物節亦不感興趣，未見資金入場追貨。
恒指噚日回吐逾百點，但收市跌幅已較盤中低點跌幅削半，雖然未能企穩20000大關，但暫時守住19800關都算係咁。不過成交額又回落至1030億元，反映場內資金面薄弱，買盤未見積極，大市都係由期指主導，指數上上落落炒波幅。人民幣雙櫃台買賣，雷聲大，雨點小，呢個都係古天后意料中事。講嚟講去，港股由18000水平反彈至今，一直未見資金配合，除咗係技術反彈同挾淡倉外，講唔上係乜嘢回復強勢。留意反彈未能企穩100日線，若再失250日線及50日線，本輪反彈好大機會結束，只係6月份好友得勢，未必會放過淡友，回調至19500水平或者又守住，假如去到期指結算後，仍未有任何好消息配合，唔排除大市再次調頭向下，坊間唔少聲音指上月低位已見咗全年低位，似乎係有啲過份樂觀。
