因為Mr. Bean,霸戲哥居然一口氣煲晒成套Netflix劇。佢套《人蜂不兩立》雖然斬開九集,但當去到每集尾聲時,就算你幾眼瞓,身體都好似唔受控制咁煲埋去,直至意識到第二朝原來要早起時先心知不妙。

能夠深宵戇狗狗睇戇豆而自豪嘅,肯定唔止霸戲哥一個。好似又要湊仔、又要開壇講股嘅唐牛,咪一樣咁無聊。

霸戲哥鍾意咗Mr. Bean大大話話都超過半個世紀,每年聖誕都例行公事要翻睇「Mr. Bean過聖誕」,保守估計至少睇過30次。奇在佢嘅笑料幾十年來千篇一律,無論係《戇豆先生》抑或《特務戇J》,堆砌嘅笑料都不外乎剝光豬、打爛嘢、鹹濕嘢同炒車,但觀眾咁多年嚟都照單全收。

今次呢套《人蜂不兩立》,就係講佢幫人看屋(to be precise係豪宅),因為畀一隻蜜蜂滋騷,搞到燒咗人間屋。其實劇情真係超級無聊,但Mr. Bean就係有呢個魔力,你明知佢會破壞所有嘢先收手,但個心總係想睇吓佢點撞板,然後擺出一個不在乎嘅戇狗狗樣。

Netflix成日畀人話冇好嘢好睇,不如搵Mr. Bean拍多幾齣呢類戲,保證可以留得住我哋呢班無聊觀眾。




霸戲哥

** 博客文章文責自負,不代表本公司立場 **