*

其他文章
儲錢更要儲肌肉

霸戲哥之日常#293| 與倪匡有緣

倪匡先生先行一步了,喺地球活到87歲,係時候拜訪其他星球吧。

利申,霸戲哥從來唔係衞斯理迷,見同學個個拎住本《藍血人》、《支離人》、《老貓》出入「霍英東圖書館」,唯獨我借《主席手記》、《捕捉女王》同《天子門生》,自覺同畢華流一樣咁不入流。認真,當時對倪匡先生嘅認識比倪震更少,同埋印象中佢只係《今夜不設防》入面又煙又酒嘅老頑童。
 
人大咗,先知倪匡先生最叻唔係日寫萬字嘅天賦,而係佢瀟灑嘅處世態度,同埋對貝殼嘅鍾愛與認識。一個人到底又幾奇怪,先會對貝殼癡迷成咁?當刻立志,若有機會見到倪匡本尊,一定要討論貝殼,好歹都叫做讀過吓marine biology。

後來霸戲哥因工作關係,真係有幸同倪匡先生有過幾面之緣。第一次最無稽,話說有次要電話訪問前輩關於《精武門》,類似陳真係咪真有其人之類。當刻霸戲哥戰戰兢兢,一來擔心打擾老人家,二來問啲咁無聊問題怕失禮。電話比想像中容易接通,遠處傳來一把《今夜不設防》嘅熟悉聲音,倪大俠非但冇嫌霸戲哥無聊,仲同我傾足10分鐘偈,最後居然唔記得問陳真個蠢問題。

之後倪匡有段時間要錄影霸戲哥有份製作嘅節目,而咁啱我係少數聽得明佢講乜嘅人,順理成章負責接待對方。我敢講倪匡絕對係奇人, 係出奇地完全零架子,比起其他薄有名氣嘅文化界前輩平易近人一萬倍。記得當時一有空檔,霸戲哥都會主動同倪匡先生傾偈,每次都有嘢袋落袋。

但霸戲哥竟然唔記得討論貝殼……呢個反而成為咗我嘅遺撼。

人總有一死,遺體最終都會化作星塵。但我相信倪匡先生嘅離去,呢個世界係會少咁啲嘢。

霸戲哥

** 博客文章文責自負,不代表本公司立場 **

儲錢更要儲肌肉

積谷防飢,到了中老年紀就要儲錢,準備退休後的生活。 年紀大了,肌肉流 ...