潮流興轉型，或者政府想見到專業人才輪流轉行送外賣，咁只要沿用番現行對電影從業員嘅援助政策（即係隻眼開隻眼閉政策），唔使半年，必定滿足到「以結果為目標」。

香港影業協會同香港戲院商會下屬機構香港票房有限公司，啱啱公佈咗2022年上半季嘅票房收入。不過所謂嘅上半季，其實只不過係兩個幾月，因為多得天才政府嘅防疫政策，戲院4月21號先至有得打開門做生意。至於首輪上映嘅73部電影之中，只得6部係香港電影，灰到連十大票房排行榜都整唔到。

排第一位係仲上緊畫嘅《逃獄兄弟3》，截止6月30號票房為71萬，即即係100萬都回收唔到。每年嘅新年檔同復活節檔都係電影黃金檔期，但因為疫情打亂晒片商、電影院線嘅部署，可以話係無妄之災同損失慘重。但就算業界多次發聲要求政府加大援助，無奈政府完全愛理不理，令投資者都唔敢貿貿然科水開戲。

呢個當然係惡性循環，投資者卻步，變相令電影從業員冇工開，又或者降低成本，令作品水平下降。長遠落去，香港電影只會越來越難拍，又越來越難睇，觀眾自然會轉睇其他。

或者到咗某一日，拍戲原來連飯盒都冇，咁到時就算一街外賣仔，都無餐可送了。




霸戲哥

** 博客文章文責自負,不代表本公司立場 **