黃明德憑《冤枉新秀訓練營》成功出道 面對張敬軒唔敢講嘢

見到軒公秒變鵪鶉。

近年音樂圈後浪強勁，其實都多得有不同的選秀節目發掘新人，除了主流電視台舉辦的《聲夢傳奇》及《全民造星》等，其實唱片公司都好積極搞比賽，就好似多年前由電視台與唱片公司合辦的「新秀歌唱大賽」（後期改名為「全球華人新秀歌唱大賽」），圈中不少紅星都是由此起步，如：梅艷芳、黎明、許志安、蘇永康、陳奕迅、楊千嬅等等，為樂壇注入新血。英皇近年為迎合時代轉變，連「新秀」都轉型變真人騷節目《冤枉新秀訓練營》在網上播出，今年更發掘了多位有潛質新人,，其中入到最後5強、下周就踏入19歲的黃明德（Dark）就憑好歌喉得到英皇賞識正式出道。

黃明德早前參加英皇搞的真人騷節目《冤枉新秀訓練營》後成功出道。 ​

Dark最近已先後推出了2首單曲《留班同學》及《沒有穿校服的日子》，講返當初參加比賽機會，原來他是被選中的幸運兒，「我平時都有Post好多唱歌Cover片上網，因為以前我做開Busking，機緣巧合下英皇搞咗個真人騷《冤枉新秀訓練營》，佢哋搵咗我參加踢館組，好好彩去到決賽最後5強。」由於比賽有網民投票成份，Dark觀眾緣加實力都唔錯，計算投票票數更打入3甲。

黃明德（左）觀眾緣及實力都唔錯，計投票票數入到3甲。

單曲《留班同學》是黃明德的個人經歷，因為他於中一、中二兩度留班，而現時他仍是一名中學生。

張敬軒有份做《冤枉新秀訓練營》評判。

面對張敬軒唔敢講嘢

由於是次比賽於網上播出，Dark都很在意網民的反應，「一出條片就會去睇啲留言有冇人鬧我，有啲好深刻嘅，有啲人會話我好寸咁。」他指可能是因為平時說話有些輕佻，或太年輕說話直接而令網民產生錯覺。Dark直認面對同輩說話較直接，但面對前輩，他就選擇收口，「完全係唔夠膽講嘢，見到所有（英皇）師兄師姐都好興奮，因為未見過真人呀嘛！不過最深刻係見到軒仔（張敬軒）……張生，唔係軒仔……係張生。」連稱呼都唔敢亂叫，睇嚟真係好尊敬軒仔噃！「因為佢畀咗好多提點我哋，佢好好……其實嗰日佢唔需要過嚟，但佢都好好，畀意見我哋點樣做好啲個表演，畀好多想像空間我哋去諗嗰首歌要點唱。」

黃明德坦言見到張敬軒唔敢講嘢。

黃明德（中）出道前有5個月Busking經驗。

Busking唱《陀飛輪》被批評

Dark參加比賽前，曾有5個月Busking的經驗，唔講唔知，原來揀地點Busking都要睇級數，「通常係沙田、大圍、旺角嗰啲區，喺我哋Busking界叫做高級啲，好似好勁先去到旺角Busking，但嗰陣我開始Busking冇耐，唔敢去嗰啲地方，咁就留喺啲平民少少嘅地方。」Dark分享Busking走鬼屬平常事，最令他深刻是遇到路人批評，「我喺大圍唱緊陳奕迅嘅《陀飛輪》，本身有幾個人聽緊，突然有個女人好遠行過嚟話『好難聽呀，返屋企啦』，咁就走咗。我呆咗一呆，之後都繼續唱。」他坦言當下感到很尷尬，更因此反思自己，「因為佢一定係覺得我難聽先會咁樣鬧㗎嘛！我返屋企有諗過係咪真係咁難聽，佢本身唔係企喺度睇緊我㗎喎！佢行過咋噃，咁遠都聽到我咁難聽，即係特登行過嚟鬧我，佢已經花咗好多心機去鬧我，佢本身可以就咁行過，佢好用心話我知難聽。」他笑言這次遭遇令他有一段時間不敢唱陳奕迅的歌。他指Busking的確令他變得大膽，很開心可以看到觀眾的即時反應。

黃明德曾被路人批評唱歌難聽，令他反思自己。

軒公對人好好，呼籲各位新人唔好驚佢！

其中一位參賽者追問張敬軒：「我想問吓你着泳衣條數幾時找？」軒仔回應：「我話俾你聽我操緊呀真係！」

張敬軒、Gin Lee李幸倪、泳兒（Vincy）、黃明德（Dark）、黎展峯（Andy）及洪助昇（Aiden）日前到海洋公園出席《EEG電笠人人和音校園巡演》，劉若寶（Polly）擔任當晚MC，活動邀請了南區七間中學的學生及一些低收入家庭入場欣賞演出，目的是希望透過歌手分享自身經歷，鼓勵學生積極面對問題及認識自己，面對疑難時，總會有方法解決及抒發的途徑，他們並不孤單。

《EEG電笠人人和音校園巡演》。

Polly劉若寶

六位歌手除了唱歌，更與觀眾大玩遊戲，台下觀眾反應熱烈。壓軸出場的軒仔除了唱出《隱形遊樂場》及《青春告別式》，更帶來小手信送給現場觀眾，「今年我發行咗一款月曆，有我嘅玉照。」隨即引來全場起哄，而站在軒仔身旁的Vincy出奇不意一句：「係咪着泳衣㗎？」觀眾又再次嗌爆場館，這時其中一位參賽者乘機追問軒仔：「我想問吓你着泳衣條數幾時找？」全場大聲歡呼，軒仔回應：「咁多人記得㗎咩？我話俾你聽我操緊呀真係！」

軒仔遭參賽者追數，「我想問吓你着泳衣條數幾時找？」

去到問答環節，有學生問軒仔，自己於社交平台跟人嗌交，但其實他只是想表達自己真正觀點，卻被人攻擊，十分激氣，軒仔認為Social Media已經是我們生活的一部份，是一個讓人發表自己意見的地方，「每一個人都有自己嘅觀點、有自己想講嘅說話，只要唔係好傷害到人，我覺得係應該要互相尊重。我覺得學識去聽人哋嘅說話或者接納人哋嘅意見、學識思考，就算佢講嗰樣嘢唔係自己所認同，都要嘗試去認識，『哦！原來呢個世界有啲人係咁樣諗嘢㗎喎。』我覺得對自己嘅修為、對自己智慧嘅增長都係一個有好嘅提升。」

軒仔與學生分享表達自己真正觀點，以及決自己不開心的方法。

軒仔分享解決自己不開心的方法就是幫助別人，「好多嘅小行為、好多嘅善事你都可以嘗試去做，因為你發現原來喺幫人哋嘅過程當中可以療癒到自己，『勿以善小而不為』，你對你鄰居、對屋企人、對身邊嘅同事、朋友，伸出你嘅援手，你會發現原來自己嘅價值就係喺嗰啲地方體現，而唔係發幾多脾氣、喺網上鬧人，所以希望大家同我都一樣喺日常生活當中、喺呢個修羅場裏面，好好咁提升自己嘅智慧，搵到一個屬於自己嘅遊樂場。」

Gin當晚唱出新歌《Diff.》及《企好》，兩首歌曲亦十分正能量，她認為聽歌是一個很好抒發負能量的方法，有學生問到因為自己想成為youtuber，但父母想他找一些比較踏實的工作，令他十分懊惱，Gin隨即分享自身經歷，「鍾意同擅長係兩樣嘢。如果十個有九個人都話你唱歌好叻，咁就有好大嘅可能你係唱歌好叻，如果你好鍾意唱歌，但得一個人話：『嗯……都可以吖。』咁你就要諗一樣嘢係咪未必啱自己呢。』」

Gin唱出新歌《Diff.》及《企好》。

Gin續說：「好似我想做歌手，一個我好尊敬嘅一位音樂人佢同我講：『你唔應該做歌手，如果你要做歌手，就唔該你廢咗你全身嘅武功，重新學過啦！』嘩！呢一個feedback來自我一個好尊敬嘅音樂人，我聽到嘅時候傷心咗好幾日。我好想去證明俾我得或者唔得，所以我透過自己嘅努力去搵答案，俾個時限自己，如果做到嘅話，咁我就搵到個答案；如果試咗好一段時間都未得，咁我又要再諗一諗呢條路係咪啱自己呢？呢條路其實係好漫長，需要好多毅力、堅持、耐性，當你想放棄嘅時候，你再諗返起你嘅初心。」

Gin又分享自身經歷。

另外，有學生問到，自己經常被誤會「好串」，其實只是不想說話，但又不想解釋，問應該怎樣做。Vincy即道：「好似講緊我咁嘅？」原來她入行初期都遇過這情況，「有啲人認識咗我之後，同我講返以為我好有距離，但識咗我之後原來我都唔係真係咁串，我又覺得幾好，因為當對方深入了解咗你之後就會有個反差。所以我覺得你唔需要去解釋，唔一定個個人都鍾意你，最緊要係你嘅心態，只要你自己覺得其實我個人係唔串嘅，咁就已經好足夠，唔需要迎合別人，做返自己。」而Andy及Aiden則表示會透過做運動來紓緩壓力，Dark感到有壓力時便會寫歌，在歌曲中表達一切。

Vincy分享入行初期被被誤會「好串」的情況。

Aiden洪助昇

Andy黎展峯

Dark黃明德

大合照