盂蘭節快到，大家未碰到污糟嘢之前，就先畀一堆靈異影視作品包圍。之前喺myTV SUPER大受好評嘅靈異劇《凶宅清潔師》，徇眾要求下，將會喺今個禮禮六夜晚10點半喺J2首播。
套劇叫《凶宅清潔師》，霸戲哥第一時間以為係《救僵清道夫》啲friend，但原來無乜關係嘅。洪永城飾演嘅招仔，18年前因為玩碟仙玩出禍，間接累死老竇老母，為咗報復，決心學捉鬼搵碟仙鬼報仇，慢慢揭開事件真相……好一齣《金宵大廈》x 《18年後的終極告白》（笑）。
現實生活入面，都有唔少人因為玩碟仙而走火入魔，有人因為惶恐而一沉不起，被其他人以為「撞邪」。招仔都一樣，18年嚟一直內疚害死全家，冇辦法過正常生活。點樣先可以走出陰霾擺脫心魔？或者就係套劇想帶出嘅訊息。
最需要清潔嘅，唔係凶宅，係自己嘅心房。
霸戲哥
** 博客文章文責自負,不代表本公司立場 **