8月12日，多雲，有驟雨及幾陣狂風雷暴，兩勢有時頗大。美股隔晚高開後有回吐，三大指數個別發展，道指升27點；標指跟納指分別跌2點及74點。雖然通脹數據顯示通脹有機會見頂回落，但再有聯儲銀行行長表示，目前美國仍難言戰勝通脹，距離2%通脹目標仍甚遠，尤其核心通脹仍然高企，服務業價格升幅未見放緩，9月份再度加息0.75厘機會仍在。

瑞銀財富管理亦提醒，距離下月聯儲局議息仍有一段時間，投資者唔應該對目前數據反應過敏，妄想聯儲局會暫停加息。下次會議至少加息0.5厘，而喺年底前利率仍然上調。喺宏觀經濟環境及貨幣政策方向模糊下，暫時投資者仍未宜進取。

對於有講法指美股已脫熊入牛，古天后對此有所保留，暫時聯儲局喺縮表收水方面，未見太積極，但通脹若遲遲未見顯著回落，聯儲局2%嘅通脹目標要達到，遲早都要加大收水力度，當市場資金唔再充裕，市場回歸理性，美股仍有機會再向下震盪。

至於中港股市噚日反彈，相對A股成交相對港股較為見得人，噚日A股成交額仍錄得萬億元之上，外資錄得161億元淨資金入，至少都叫肯買下貨。相反港股成交額只有821億元，即使噚日反彈幾百點，重返2萬大關之上，亦未見有資金積極流入。就連一向任性嘅北水，亦小心翼翼，近日淨買入一直縮水。港股表現當然遠遠不及美股，就連A股步伐亦趕唔上，望一望個創科指，唔覺唔覺已較4月低位反彈近三成，但港股一直喺二萬水平穿梭，日升日跌，大戶短線好淡通殺。唔少缸邊友意志已被消磨，更指入市港股係自尋短見，已唔再願意入場。港股成交額日漸萎縮，缸邊友已厭倦追升殺跌嘅日子，更對表現如垃圾嘅港股採放棄態度，轉身離去，頭也不回。

古天后

(徐狄怡，證監會持牌人)